Governu Timor-Leste

Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Aabitasaun Komunitária, Mariano Assanami Sabino, partisipa nu’udar oradór iha formasaun lideransa Rotary Youth Leadership Awards (RYLA, akrónimu iha lian Inglés) Timor-Leste tinan 2024, ne’ebé promove hosi Rotary Club Timor-Leste, iha loron 11 fulan-outubru tinan 2024, iha Likisá. Durante ninia diskursu, governante ne’e ko’alia liu importánsia juventude iha konstrusaun futuru nasaun nian no enkoraja joven sira atu hasoru dezafiu sosiál no teknolójiku ohin loron nian. 

Iha ninia intervensaun, Mariano Assanami Sabino aprezenta tema “Evolusaun no Responsabilidade Foin-sa’e sira iha Setór Sosiál”, no subliña papél fundamentál jerasaun foun iha dezenvolvimentu nasaun. “Futuru nasaun ida ne’e depende tebes ba joven sira. Nune’e, Estadu no Governu hala’o nafatin ninia kna’ar prinsipál, liuhusi kria programa iha área polítika, ekonomia, kultura no sosiál, hodi garante futuru juventude nian”, afirma Vise-Primeiru-Ministru.

Governante ne’e louva serbisu ekipa RYLA Timor-Leste nian, hodi hateten katak formasaun anuál ne’e hala’o ona papél importante hodi prepara foin-sa’e sira sai sidadaun ne’ebé útil no ativu iha sosiedade. “Joven sira ne’ebé iha oportunidade hodi partisipa iha formasaun ne’e tenke aproveita didi’ak. Bainhira sira fila ba sira-nia komunidade, sira tenke serbisu hamutuk, hametin espíritu voluntáriu no hala’o asaun sosiál iha fatin ne’ebé sira hela ba”, nia hatutan. 

Durante formasaun ne’e, hetan partisipasaun hosi joven na’in 84, Vise-Primeiru-Ministru haktuir hikas importánsia hosi “revolusaun karatér sosiál” ida entre joven timoroan sira, no enkoraja sira atu adota prinsípiu autodeterminasaun hodi hametin patriotizmu no nasionalizmu, atu nune’e bele kontribui ba konstrusaun Estadu, Nasaun. “Timor-Leste adota sistema demokrátiku ida, ne’ebé garante direitu ema hotu nian no liberdade hodi la’o hale’u territóriu, la senti ameasadu ka tauk”, nia subliña, hodi refere ba nesesidade organizasaun sira, inklui arte marsiál, uza “sira nia plataforma ba asaun pozitiva”. 

Iha era evolusaun teknolójiku ne’ebé lalais, Mariano Assanami Sabino destaka mós importánsia hosi joven timoroan sira hodi adapta ba ferramenta dijitál foun sira, ne'ebé atualiza beibeik. “Esensiál ba ita hodi uza ferramenta sira ne’e ho di’ak, hodi la’o hamutuk ho dezenvolvimentu globál sira”, nia fó hanoin.

RYLA Timor-Leste tinan 2024, ne’ebé organiza husi Rotary Club of Timor-Leste, tinan-tinan foka ba formasaun lider joven sira, prepara sira atu hasoru dezafius iha futuru no kontribui ho ativu ba dezenvolvimentu nasaun nian.