Timor-Leste Hametin Parseria Rejionál iha Sorumutuk sira ne’ebé iha relasaun ho Simeira ASEAN nian ba dala 44 no 45
Primeiru Ministru, Kay Rala Xanana Gusmão, partisipa iha Simeira ASEAN dala 44 no 45, ne’ebé hala’o iha Vientiane, Laos, husi loron 9 to’o 11 fulan-outubru tinan 2024. Durante Sesaun Plenária, Xanana Gusmão husu ba ASEAN atu sai ezemplu internasionál iha kooperasaun unidade no konfiansa. “Ita moris iha tempu susar iha relasaun internasionál sira”, nia afirma, no nia ko’alia liu ba importánsia atu promove diálogu no solidariedade atu hasoru tensaun global ne’ebé aumenta. Primeiru Ministru subliña kna’ar nian ASEAN nu’udar modelu integrasaun rejionál no elojia apoiu kontínua husi Estadu Membrus iha prosesu adezaun Timor-Leste nian. 
Aleinde sesaun plenária, Primeiru Ministru partisipa iha sorumutuk oioin nivel as ho lider país ASEAN sira no parseiru estratéjiku. Delegasaun Timor-Leste nian inklui Vise Primeiru Ministru no Ministru Koordenadór Asuntu Ekonómiku, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, entre membru Governu sira-seluk. 
Iha Forum Simeira Leste Aziátiku (EAS) ba dala 19, ne’ebé hala’o iha loron 11 fulan-outubru tinan 2024, Primeiru Ministru, Xanana Gusmão, elojia “ASEAN” tanba promove diálogu no kooperasaun iha kestaun estratéjika, polítika no ekonómika ne’ebé sai interese komún iha ÁZIA Orientál” no subliña kompromisu Timor-Leste nian hodi kontribui ba inisiativa rejionál ne’ebé foka-liu ba promosaun pás no dezenvolvimentu”. Laiha Pás, Laiha Dezenvolvimentu”, nia hateten, hodi refere ba konflitu no tensaun jeopolítika. Xanana Gusmão husu mós atu respeita direitu internasionál no subliña importánsia husi diálogu inkluzivu kona-ba kestaun Myanmar, Tasi Súl Xina no Península Korea nian.
Nafatin iha loron 11 fulan-outubru, Primeiru Ministru mós partisipa iha Simeira ASEAN -ONU nian ba dala 14, iha ne’ebé promove reziliénsia no konektividade ASEAN nian sai tema prinsipál. Eventu ne’e konta mós ho prezensa Sekretáriu-Jerál Nasoins Unidas, António Guterres, no lideres ASEAN no nasaun sira-seluk. Iha okaziaun ne’e, Xanana Gusmão reafirma Timor-Leste nia kompromisu ba integrasaun rejionál no kolaborasaun hodi hasoru dezafiu globál sira. 
Iha loron 10 fulan-outubru tinan 2024, durante Simeira ASEAN-Índia ba dala 21, Primeiru Ministru Xanana Gusmão elojia parseria forte entre ASEAN no Índia. Nia destaka impaktu pozitivu husi vizita istórika Prezidente Índia nian mai Timor-Leste no hametin kna’ar Índia nian hanesan defensora ba interese sira husi Súl Globál. Xefe Governu salienta mós importánsia hosi “espíritu kolaborativu Parseria Estratéjika Abranjente ASEAN-Índia”, hodi promove estabilidade no prosperiedade rejionál”.
Iha Simeira Espesiál ASEAN-Kanadá kona-ba Konektividade no Reziliénsia, ne’ebé hala’o iha loron hanesan, Timor-Leste, ne’ebé reprezenta husi Ministru Negósiu Estranjeiru no Kooperasaun, elojia “esforsus ASEAN no Kanada nian hodi promove parseria estratéjika ne’ebé metin, ho objetivu ba kolaborasaun ida ne’ebé iha benefísiu ba malu no hakle’an kooperasaun iha pilar tolu ASEAN nia okos”.
Nune’e mós iha loron 10 fulan-outubru, iha Simeira ASEAN-Austrália ba dala 4, Primeiru-Ministru reforsa importánsia hosi lasu istóriku sira entre Timor-Leste no Austrália, ne’ebé deskreve hanesan “parseiru dezenvolvimentu ida ne’ebé importante”. Nia rekoñese “progresu signifikativu ne’ebé halo hodi hametin Parseria Estratéjika Abranjente ASEAN-Austrália, ne’ebé sei ajuda hadi’a kooperasaun iha komérsiu, investimentu, ekonomia dijitál no iha saúde públika”. Xanana Gusmão elojia mós “Austrália nia kompromisu finanseiru hodi rezolve dezafiu rejionál sira no promove dezenvolvimentu sustentável, komérsiu no investimentu, no seguransa ai-han”. 
Durante Simeira ASEAN-Koreia-Súl ba dala 25, Xanana Gusmão destaka kona-ba “relasaun bilaterál sira entre Timor-Leste no Koreia”, deskreve hanesan “metin no fó benefísiu ba malu”. Primeiru-Ministru subliña katak, “dezde independénsia”, Timor-Leste “hetan benefísiu hosi projetu oin-oin ne’ebé hetan apoiu hosi Repúblika Koreia iha área sira hanesan edukasaun, saúde, igualdade jéneru no formasaun, esensiál hotu-hotu hodi prepara Timor-Leste ba adezaun tomak iha ASEAN”. Nia mós hato’o ninia agradesimentu “ba oportunidade empregu ne’ebé fornese ba traballadór timoroan maizumenus rihun ida ne’ebé haruka tinan-tinan ba Koreia, hodi kontribui maka’as ba ita-nia dezenvolvimentu sosioekonómiku no hametin lasu kulturál entre ita-nia nasaun sira.”
Iha Simeira ASEAN-Xina ba dala 27, Primeiru-Ministru subliña relasaun amizade kleur entre Timor-Leste no Xina, “hanesan nasaun dahuluk ne’ebé estabelese lasu diplomátiku sira hafoin Timor-Leste nia independénsia iha tinan 2002”. Nia hateten "parseria estratéjiku komprensivu", ne'ebé konkorda "iha fulan-setembru tinan kotuk", ne'ebé "ho objetivu atu promove kreximentu ekonómiku no diversifikasaun liuhosi aumentu komérsiu no investimentu, hodi ajuda harii ekonomia ida ne'ebé metin no reziliente." Xanana Gusmão espresa Timor-Leste nia apoiu “ba esforsu sira ASEAN nian hodi hametin lasu ho Xina liuhosi kompromisu konstrutivu, respeitu ba malu no iha kooperasaun” no nia deklara katak “iha tempu funu nian iha fatin hotu-hotu, ita tenke garante katak Ázia hanesan uma ba dame.”
Iha loron hanesan, Xanana Gusmão partisipa iha Simeira ASEAN-Japaun, hodi ko’alia liu kooperasaunne’ebé metin entre Japaun no Timor-Leste iha área oin-oin, “hanesan dezenvolvimentu infraestrutura, diversifikasaun ekonómika, servisu sosiál no formasaun.” Primeiru-Ministru hato’o nia hakarak atu “aprofunda relasaun bilaterál ho Japaun, nune’e mós hametin kolaborasaun iha ámbitu parseria ASEAN-Japaun hodi apoia amizade no kooperasaun rejionál”. 
Iha Simeira ASEAN Plus Three (APT), ne’ebé hala’o mós iha loron 10 fulan-outubru, ne’ebé inklui Xina, Japaun no Koreia, Xanana Gusmão espresa Timor-Leste nia apoiu ba “Vizaun ASEAN nian ba Indo-Pasífiku nu’udar enkuadramentu atu forma arkitetura ekonómika no seguransa rejiaun nian”. Nia destaka importánsia hosi "diálogu pasífiku kontínuu entre parte hotu-hotu ne'ebé envolve atu nune'e bele hetan dame no estabilidade iha Península Koreanu ne'ebé deznuklearizadu tuir rezolusaun sira Konsellu Seguransa ONU nian ne'ebé relevante." Nia mós hatudu vontade Timor-Leste nian hodi "kontinua envolvimentu no kooperasaun iha esforsu koletivu sira hodi promove dame, estabilidade no prosperidade rejionál".
Iha loron 9 fulan-outubru, Xanana Gusmão partisipa iha Sesaun Retiru Líder sira ASEAN nian, iha ne’ebé líder sira ko’alia liuliu kona-ba situasaun iha Myanmar.
Konsensu pontu lima ASEAN nian kona-ba Myanmar, husi tinan 2022, reforsa ona hanesan pasu esensiál ida ba restaurasaun pás no estabilidade iha país. Asisténsia umanitária ba populasaun ne’ebé afeta sai mós tema sentrál ida ba diskusaun sira.
Nune’e mós iha loron 9 fulan-outubru, Xanana Gusmão, iha deklarasaun ida ne’ebé hato’o hosi Vise-Primeiru-Ministru, Francisco Kalbuadi Lay, iha Forum Konsellu Konsultivu Negósiu ASEAN nian, subliña katak “iha dalan ba adezaun, [Timor-Leste] serbisu hodi aliña [ninia] prioridade nasionál sira ho vizaun ba Komunidade Ekonómika ASEAN.” Nia mós destaka importánsia hosi "setór privadu ida ne'ebé forte" hodi "kria empregu ba ita-nia povu no fó esperansa ba futuru ida ne'ebé prósperu liu."Iha deklarasaun, ko’alia-liu mós kona-ba importánsia atu atrai investimentu estranjeiru no hametin parseria rejionál sira, iha área potensiál estratéjiku no “ho potensiál kreximentu maka’as” iha país, hanesan “turizmu, agrikultura no petróleu”. Nia mós espresa konfiansa “katak Konsellu Konsultivu Negósiu ASEAN nian bele dezempeña mós papél ida hodi apoia dezenvolvimentu ekonómiku iha Timor-Leste no ba ninia integrasaun iha ekonomia rejionál”. 
Nune’e mós iha loron 9 fulan-outubru, Primeiru-Ministru partisipa iha Sorumutu entre Lideres ASEAN no Reprezentante sira Asembleia Inter-Parlamentár ASEAN nian (AIPA), iha-ne’ebé nia louva Asembleia nia serbisu ne’ebé “ajuda armoniza no hametin enkuadramentu lejizlativu sira, hodi aliña sira ho norma no prátika ASEAN nian.” Primeiru-Ministru destaka mós katak, atu partisipa iha atividade AIPA nian, Timor-Leste “hetan koñesimentu no aprende prátika di’ak sira ne’ebé sei hametin liután ita-nia prosesu lejizlativu no ita-nia estrutura governasaun nian.” Ikusliu, nia reafirma kompromisu Timor-Leste nian atu “kompleta prosesu internu hodi adere ba akordu prioridade sira iha pilár tolu Komunidade ASEAN nian to’o tinan oin,” nia subliña hakarak atu kontinua kolabora ho Membru Parlamentu ASEAN nian no parseiru sira dezenvolvimentu nian iha dalan ba adezaun plena.
Iha loron hanesan, Primeiru-Ministru ne’ebé reprezenta husi Vise-Primeiru-Ministru, Francisco Kalbuadi Lay, iha Sorumutu entre Lider ASEAN no Juventude ASEAN nian, iha ne’ebé nia foka-liu ba importánsia papél joven sira-nian iha dezenvolvimentu nasionál no rejionál. “Joven sira maka futuru ba ita-nia nasaun,” afirma Kalbuadi Lay hodi subliña nesesidade atu investe iha juventude hodi hasoru dezafiu globál sira.
Iha loron 10 fulan-outubru, Primeiru-Ministru mós partisipa iha han-kalan amizade ne’ebé organiza hosi Primeiru-Ministru Laos, Sonexay SIPHANDONE, ba lideres ASEAN nian. 
Durante serimónia enserramentu Simeira ASEAN nian ba dala 44 no 45, Primeiru-Ministru Laos nian, Sonexay Siphandone, ofisialmente entrega prezidénsia rotativa ASEAN nian iha tinan 2025 ba Primeiru-Ministru Malázia, Anwar Ibrahim. Tranzisaun ida-ne'e marka inísiu hosi siklu lideransa foun ida ba Malázia, ne'ebé sei sai responsavel hodi define prioridade sira no koordena inisiativa ASEAN nian iha tinan oinmai.
Lee diskursu Primeiru-Ministru, Kay Rala Xanana Gusmão nian, iha Portál Governu liuhusi link tuirmai:
Primeiru Ministru › Intervensaun: https://timor-leste.gov.tl/?cat=27&page=1&lang=pt 
