Governu Timor-Leste

Hanesan parte ida hosi konsolidasaun relasaun bilaterál no kooperasaun estratéjika, Ministru Prezidénsia Konsellu Ministru, Agio Pereira, halo hela vizita ofisiál ba Brunei Darussalam hosi loron 6 to’o loron 10 fulan-outubru tinan 2024, akompaña hosi Embaixadór Timor-Leste ba Brunei Darussalam, Abel Guterres. Ida ne’e hanesan vizita ne’ebé ho objetivu atu hametin lasu diplomátiku no esplora oportunidade foun ba kolaborasaun, liuliu iha área enerjia no ekonomia nian. 

Iha loron 7 fulan-outubru, Ministru Agio Pereira simu iha audiénsia husi Sua Majestade Sultan Yang Di-Pertuan husi Brunei Darussalam. Iha sorumutu ne’e, Agio Pereira hato’o saudasaun ho entuziazmu no kumprimentus husi Prezidente Repúblika, José Ramos-Horta, no Primeiru-Ministru, Kay Rala Xanana Gusmão. Ministru hato’o Timor-Leste nia agradesimentu ba apoiu kontinuasaun Brunei nian, liuliu iha prosesu adezaun ba ASEAN, no ba kolaborasaun bilaterál ne’ebé dezenvolve ona iha área Transporte, Komunikasaun, Mobilidade Laborál, Edukasaun no Turizmu.

Ministru destaka progresu projetu kooperasaun iha setór enerjétiku, ho énfaze ba projetu Greater Sunrise, oras ne’e iha faze preparasaun. Agio Pereira, nu’udar interlokutór iha diskusaun kona-ba Greater Sunrise, reforsa importánsia kolaborasaun Brunei nian, tanba haree ba nia koñesimentu no esperiénsia ne’ebé luan iha esplorasaun no dezenvolvimentu indústria ‘onshore’ no ‘offshore’. Iha enkontru ne’e diskute mós kona-ba posibilidade atu Brunei partisipa hanesan parseiru estratéjiku iha projetu ida-ne’e, haree ba nia relevánsia ba dezenvolvimentu ekonómiku sustentável Timor-Leste nian. 

Nafatin iha loron 7, Ministru Agio Pereira hasoru-malu ho Ministru Gabinete Primeiru Ministru no Ministru Defeza II, Pehin Datu Lailaraja Major Jeneral Dato Paduka Seri Awang Haji Halbi bin Haji Mohd Yussof. Enkontru ne’e foka ba troka esperiénsia no prátika di’ak liu iha setór enerjétiku, liuliu iha jestaun indústria petróleu no gás, ne’ebé fundamentál ba kreximentu ekonómiku Brunei nian. Timor-Leste hatudu nia interese hodi haruka tékniku no funsionáriu sira ba programa formasaun iha empreza petrolífera sira iha Brunei, ho objetivu atu hetan abilidade espesializada iha setór ne’e no hametin kooperasaun iha área esplorasaun no prosesamentu rekursu nian. 

Iha loron 9 fulan-outubru, Ministru Agio Pereira sei hasoru-malu ho Yang Mulia Awang Haji Khairuddin bin Haji Abdul Hamid, Vise Ministru Finansa no Ekonomia. Durante enkontru ne’e, sei ko’alia kona-ba tema sira hanesan promove investimentu estranjeiru diretu, hametin komérsiu bilaterál no kooperasaun iha dezenvolvimentu ekonómiku no seguransa ai-han.

Ajenda vizita nian inklui mós vizita ida ba Brunei LNG Sendirian Berhad, empreza ida hosi gás naturál likidu prinsipál sira iha Brunei, ne'ebé hala'o operasaun kontínuu hosi instalasaun ne’e no hala'o ona operasaun durante tinan 52, ho kompromisu maka'as ba seguransa no efisiénsia.Husikedas tinan 1989, Brunei LNG produz ona besik tonelada millaun 289 hosi gás naturál likidu no esporta liuliu ba Japaun, no mós ba merkadu sira seluk hanesan Koreia, Taiwan, Xina no Malázia. Ministru hala’o mós vizita ba Sentru SPARK, iha ne’ebé hetan oportunidade hodi vizita instalasaun sira husi Indústria Adubu Brunei no Kompañia Metanol Brunei Sdn Bhd, ho objetivu atu identifika oportunidade ba kooperasaun teknolójika no industriál entre nasaun rua ne’e, hodi foka liu ba dezenvolvimentu projetu enerjétiku no produsaun adubu, ho benefísiu ba ekonomia país rua ne’e.