Governu Timor-Leste

Governu, serbisu hamutuk ho Prezidénsia Repúblika, prepara hela Festivál Rabilau, ne'ebé sei realiza entre loron 16 no 19 fulan-outubru tinan 2024. Eventu ida-ne'e, sei hala’o iha Foho Rabilau, Postu Administrativu Maubisi, iha Munisípiu Ainaru, ne’ebé maka organiza iha ámbitu Programa ba Promosaun Turizmu Nasionál, ho objetivu atu promove pás, unidade no rekonsiliasaun, iha tempu hanesan atu promove turizmu no orgullu ba patrimóniu kulturál Timor-Leste nian. 

Festivál Rabilau ne’e hanesan inisiativa konjunta ida ne'ebé lidera hosi komisaun organizadora, ho diresaun hosi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, no konta ho Prezidente Repúblika nu’udar patronu ba eventu ne'e. Festivál ne'e hetan mós partisipasaun hosi entidade governamentál oioin.

Objetivu prinsipál husi Festival Rabilau ne’e mak atu promove pás, unidade no rekonsiliasaun iha sosiedade Timor-Leste, dudu dezenvolvimentu turizmu, hodi atrai vizitante nasionál no internasionál, kria oportunidade ba edukasaun no empregu, liuliu ba joven sira, prezerva no promove patrimóniu kulturál , arte, siénsia, teknolojia no desportu iha Timor-Leste, insentiva sentidu komunidade no orgullu nasionál, hodi valoriza tradisaun no diversidade kulturál, no promove interkámbiu kulturál no relasaun entre kultura oioin. 

Festivál ne'e sei kompostu hosi área prinsipál haat. Área dahuluk, ne’ebé dedika ba Arte no Kultura no lidera hosi Sekretaria Estadu Arte no Kultura (SEAC, sigla iha lian portugés), sei iha kompetisaun pintura, múzika no arte dijitál, aleinde aprezentasaun dansa no múzika tradisionál no animasaun kulturál ho partisipasaun hosi embaixada no artista lokál sira. Área daruak, Espozisaun Siénsia no Teknolojia, ne’ebé ho koordenasaun hosi Ministériu Ensinu Superiór, Siénsia no Kultura, sei aprezenta demonstrasaun interativa no espozisaun sira ne'ebé ho objetivu atu hamosu interese iha área sientífika no teknolójika sira. Área datoluk, Desportu, ne’ebé promove hosi Ministériu Juventude, Desportu, Arte no Kultura, sei insentiva prátika desportiva, ho kompetisaun no atividade fízika ba idade hotu-hotu. Ikusliu, área Literatura no Sinema, organiza hosi Ministériu Edukasaun, sei inklui feira livru, gastronomia no ezibisaun ba sinema infantíl. 

Durante festival ne’e, públiku bele aproveita área oioin, inklui espasu sira ne'ebé atu halo entretenimentu, hahán, feira artezanatu no atividade desportivu, aleinde espozisaun ba produtu lokál no merkadu sira.

Eventu ida-ne’e ho objetivu atu hamriik-metin nu’udar selebrasaun anuál ida ba referénsia ajenda internasionál nian, hodi promove Timor-Leste nu’udar destinu turístiku no kulturál exelénsia, nomos hametin relasaun inter-kulturál no insentiva interkámbiu ba ideia no tradisaun sira.