Primeiru-Ministru Xanana Gusmão halo vizita ba Laos, Portugál no Indonézia
Primeiru-Ministru, Kay Rala Xanana Gusmão, sei halo vizita ofisiál lubun ida, ne’ebé sei hahú iha semana ida-ne’e, iha loron 8 fulan-outubru, ba Repúblika Demokrátika Populár Laos, tuirmai vizita ofisiál ida ba Portugál no tuirfali vizita ofisiál ida ba Jakarta, molok fila-mai Timor-Leste iha loron 22 fulan-outubru tinan 2024. 
Liuhusi konvite Primeiru-Ministru Repúblika Demokrátika Populár Laos, ne’ebé oras ne’e daudaun asume Prezidénsia ASEAN, Primeiru-Ministru Xanana Gusmão sei partisipa iha Simeira Xefes Estadu no Governu ASEAN nian ba dala 44 no 45 no Simeira relevantes, iha Vientiane, hosi loron 8 to'o 11 fulan-outubru. Tema husi Simeira sira ne’e mak “ASEAN: Hametin Konektividade no Reziliénsia”. Daudaun ne’e Timor-Leste nu’udar país Observadór ASEAN no iha planu sei sai membru iha tinan 2025. Iha Simeira hirak-ne’e, Primeiru-Ministru sei akompaña hosi Xefe Estadu no Governu sira seluk hosi Estadu-membru sira ASEAN nian, nune’e mós Parseirus ASEAN nian, hanesan Índia, Xina, Japaun, Kanadá, Estadus Unidus, Austrália, Nova Zelándia, Rúsia, Uniaun Europeia, Nasoins Unidas no Repúblika Koreia. Prevee katak Sekretáriu Jerál ONU sei marka prezensa. 
Hafoin Simeira ASEAN nian, Primeiru-Ministru Gusmão sei hala’o viajen ofisiál ida ba Portugál, hosi loron 12 to’o loron 18 fulan-outubru, ne’ebé nia sei hasoru malu ho Prezidente Repúblika Portugál, Marcelo Rebelo de Sousa, ho Prezidente Asembleia Repúblika, Pedro Aguiar-Branco, no ho Primeiru-Ministru portugés, Luís Montenegro. Durante sorumutu entre Primeiru-Ministru na’in-rua ne’e, sei diskute kona-ba área kooperasaun oioin hanesan justisa, edukasaun no seguransa, nomos sei asina protokolu importante tolu: Programa Estratéjiku Kooperasaun ho Portugál ba tinan 2024-2028; Programa Reabilitasaun, Patrimóniu no Turizmu; no akordu infraestrutura ida, ne'ebé nu’udar sinál expansaun kontínua nian ida ba relasaun bilaterál ne'ebé metin.
Durante ninia estadia iha Portugál, Primeiru-Ministru sei hasoru malu ho komunidade timoroan, akadémiku portugés sira no sosiedade sivíl no, ho konvite hosi Governu Rejionál Açores nian, sei vizita mós illa Faial no sei koñese diretamente projetu oioin no atividade ekonomia azúl. Primeiru-Ministru mós sei hala’o sorumutu ho Sekretáriu Ezekutivu Komunidade País Lian Portugés (CPLP, sigla iha lian portugés) no reprezentante Estadus-Membrus CPLP nian.
Iha vizita ofisiál ida-ne’e, Primeiru-Ministru sei akompaña husi Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay; Ministru Negósius Estranjeirus no Kooperasaun, Bendito dos Santos Freitas; Ministru Justisa, Sérgio de Jesus Fernandes da Costa Hornai; Ministra Edukasaun, Dulce de Jesus Soares; Ministru Ensinu Superiór no Siénsia, José Honório da Costa Pereira Jerónimo; Ministru Interiór, Francisco da Costa Guterres; Sekretáriu Estadu Komunikasaun Sosiál, Expedito Dias Ximenes; Prezidente Kámara Komérsiu no Indústria Timor-Leste, Jorge Serrano; mídia no delegadu ofisiál sira seluk.
Hafoin vizita ofisiál ba Portugál, Primeiru-Ministru Gusmão sei dezloka ba Indonézia hodi tuir Serimónia Simu Pose hosi Prezidente Repúblika Indonézia nian ba da-8, Prabowo Subianto, iha loron 20 fulan-outubru, iha Kompleksu Parlamentár Jakarta.
Enkuantu Primeiru-Ministru bá estranjeiru ho misaun ofisiál, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, maka sei koordena Governu.
