Governu Timor-Leste

Ministériu Saúde organiza Konferénsia Sientífika Sirúrjika Internasionál dahuluk, ho tema “Investe hodi hadi’a servisu saúde sirúrjika ne’ebé seguru no asesivel ba ema hotu, iha Timor-Leste”, ne’ebé hala’o iha loron 3 no 4 fulan-outubru, iha City 8, Dili.  Eventu ne'e promove hodi fahe koñesimentu entre profisionál saúde nasionál no internasionál sira hosi área oioin no destaka importánsia hodi hametin kapasidade sirúrjika nasionál. 

Iha sesaun abertura nian sura ho partisipasaun husi Vise-Ministru ba Operasionalizasaun Ospitalár, Flávio Brandão Mendes de Araújo, ne’ebé hateten nesesáriu tau-hamutuk esforsu sira, no afirma katak presiza atu “ halibur forsa entre médiku seniór no médiku junior sira, no kria ambiente ida ne’ebé saudavel no kolaborativu, iha ne'ebé ema hotu-hotu serbisu hamutuk atu hasoru dezafiu setór saúde nian,  no promove konfiansa iha ita-nia sosiedade”. 

Durante konferénsia imprensa ne’e, Vise-Ministru Flávio Araújo destaka progresu país nian iha formasaun médiku espesializadu sira iha país oioin iha tinan 20 ikus ne'e. No hateten mós katak “ohin loron ita iha sirurjiaun timoroan sira ne’ebé espesializadu iha área oioin, hanesan ortopedia, pediatria, sirurjia plástika no sirurjia jerál”. 

Eventu ne’e marka prezensa husi Diretora Klínika Hospital Nacional Guido Valadares, Ana Maria Magno, Xefe Departamentu Sirurjia no profisionál saúde nasionál no internasionál balun.