Governu Timor-Leste

Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, iha loron 1 fulan-outubru tinan 2024, prezide abertura Semináriu Nasionál kona-ba programa “Toos Uma Hun”, ne’ebé organiza husi Organizasaun Nasoins Unidas ba Ai-han no Agrikultura (FAO), iha Timor Plaza. Semináriu ida-ne’e konta ho prezensa hosi entidade no organizasaun internasionál oioin, ho objetivu atu ko’alia kona-ba integrasaun agrikultór ki’ik sira iha programa merenda eskolár nian, hodi promove konsumu produtu lokál iha eskola. 

Konsulta públika ida-ne’e dezeña atu rekolle kontribuisaun husi parte hotu-hotu ne’ebé envolve, ho objetivu atu hadi’a sistema agro-alimentár nasionál, insentiva produsaun sustentável no integradu ho merenda eskolár.

Durante ninia diskursu abertura, Vise-Primeiru-Ministru subliña importánsia hosi esforsu hamutuk ida-ne’e no agradese ba apoiu kontínuu hosi organizasaun internasionál sira iha implementasaun projetu fundamentál ida-ne’e ba seguransa ai-han nasionál. 

“Governu iha kompromisu atu haforsa programa merenda eskolár liuhosi aplikasaun Lei 36/2022, ne’ebé prevee inkluzaun produtu lokál iha menu eskolár. Esforsu ida-ne’e la’ós de’it atu hadi’a nutrisaun ba ita-nia oan sira, maibé mós atu kria merkadu ida ne’ebé sustentável no besik liután ba agrikultór ki’ik sira,” dehan Mariano Assanami Sabino. 

Vise-Primeiru-Ministru salienta tan nesesidade ba koordenasaun ida ne’ebé efetivu entre instituisaun hotu-hotu ne’ebé envolve hodi garante susesu ba programa ne’e, ne’ebé jere diretamente husi autoridade munisípiu sira. Orsamentu ba merenda eskolár aumenta iha tinan 2024, ho aumentu foun ne'ebé prevee ba tinan 2025, hodi reforsa kompromisu Governu nian atu garante ai-han ho kualidade iha eskola sira.

"Lori Governu Konstitusionál da-9 nia naran, ami agradese ba ajénsia hotu-hotu no husu ba ajénsia sira atu kontinua serbisu maka'as, tulun ami hodi hadi'a merenda eskolár. Hamutuk, ita bele fó ai-han ne'ebé saudavel liu ba ita-nia oan sira, apoia agrikultór ki'ik sira no promove dezenvolvimentu sustentável ba ita-nia nasaun”, konklui Vise-Primeiru-Ministru.

Iha semináriu ne’e konta ho partisipasaun hosi reprezentante sira hosi instituisaun nasionál no internasionál oioin, ne’ebé reafirma sira-nia kompromisu atu kolabora ho Governu iha implementasaun polítika ne’ebé garante merenda eskolár ne’ebé nutritivu no sustentável, hodi kontribui ba moris-di’ak labarik sira-nian no dezenvolvimentu ekonómiku agrikultór lokál sira-nian.