Primeiru-Ministru Entrega Sertifikadu Sidadania Timoroan nian ba Sekretáriu-Jerál ONU, António Guterres
Primeiru-Ministru, Kay Rala Xanana Gusmão, iha loron 24 fulan-setembru tinan 2024, entrega sertifikadu sidadania timoroan nian ba Sekretáriu-Jerál ONU, António Guterres, durante sorumutu ida iha sede Nasoins Unidas, iha Novaiorke, durante Asembleia-Jerál Nasoins Unidas ba dala 79.
Primeiru-Ministru hato’o onra, hodi povu Timor-Leste nia naran, entrega ba António Guterres sidadania Repúblika Demokrátika Timor-Leste nian, nu’udar rekoñesimentu ba ninia kontribuisaun no apoiu ba kauza timoroan. 
Sekretáriu Jerál ONU konsidera ne’e hanesan onra no orgullu ida hodi sai sidadaun Timor-Leste no hateten hanesan sentimentu ida ne’ebé ha’u sei lori nafatin ho ha’u.
Atribuisaun sidadania timoroan ba António Guterres ne’e hetan aprovasaun unanimidade hosi Parlamentu Nasionál, iha loron 20 fulan-agostu liubá, durante selebrasaun aniversáriu referendu 1999 nian ba dala 25, ne’ebé marka fin hosi okupasaun indonézia no loke dalan ba restaurasaun independénsia Timór-Leste nian. Fó sidadania ne’e hanesan rekoñesimentu ida ba ninia servisu makaas no relevante sira ne'ebé nia fó ba país ne’e durante dékada balun. Hanesan Primeiru-Ministru Portugal nian, hosi tinan 1995 to’o tinan 2002, Guterres hanesan defensór ida ne'ebé eminente ba kauza timoroan nian iha forum internasionál sira ne’ebé boot liu, hodi dudu realiza referendu 1999 nian, ne'ebé ikusmai hetan independénsia nasionál. 
Durante ninia vizita ofisiál mai Timor-Leste, iha ámbitu selebrasaun aniversáriu Konsulta Populár loron 30 fulan-agostu tinan 1999 nian ba dala 25, António Guterres hetan mós kondekorasaun ho Grande Kolár Orden Timor-Leste, distinsaun aas liu nasaun ne’e nian, husi Prezidente Repúblika, José Ramos-Horta.
Iha enkontru iha Novaiorke, ne’ebé hala’o durante Asembleia Jerál Nasoins Unidas nian ba dala 79, Primeiru-Ministru Xanana Gusmão no Sekretáriu-Jerál António Guterres diskute kona-ba asuntu multilaterál, ho énfaze espesiál ba promosaun demokrasia, direitus umanus no dezenvolvimentu sustentável. ONU reafirma ninia kompromisu atu kontinua fó apoiu ba dezenvolvimentu Timor-Leste nian. 
