Governu Timor-Leste

Loron 4 fulan Setembru hanesan loron importante ba povu Timor-Leste hodi simu rezultadu ba Referendu. Tama ba tinan sanulu resin ida, loron 4 fulan Setembru, Primeiru-Ministru, Kay Rala Xanana Gusmão, hala’o programa konsulta ba Planu Estratéjiku Dezenvolvimentu Nasionál (PEDN) iha sub-distritu Nain Feto, distritu Díli, Sábadu.

Antes atu tama ba aprezentasaun PEDN ba dahuluk Administradór sub-distritu Nain Feto, Felix-M.M.Da Costa Gusmão, hato’o relatóriu sub-distritu refere katak: Sub-distritu Nain Feto iha Suku 6, aldeia 38, ne’ebé mak ho populasaun sira enfrenta iha baze mak hanesan: ekonomia, saúde, edukasaun, solidariedade sosiál, rai no propriedade no infraestrutura sira. Alende ne’e sira mós husu ba Governu atu tau atensaun maka’as no haree ba móris povu ho kolektivu hanesan rekursus umanus, rekursu naturais.

Iha fatin hanesan Xefe Suku sira husu atu kanaliza bee-mos, rehabilitasaun valeta sira, lixu-fatin, no uma ba ema mukit sira no haree problema ne’ebé mak xefe suku sira enfrenta no husu ba Governu atu fó apoiu komputadór ba Xefe Suku sira, hariis-fatin no bee-mos ba sede suku, persiza tau sentru juventude iha suku laran, fó treinamentu ka kursu ba juventude iha suku laran no husu mós atu bele ajuda orsamentu no materiál ba Feto OMT sira.

Molok tama ba iha implementasaun ne’e Primeiru-Ministru, Xanana Gusmão, fó nia hanoin kona-ba problema sira ne’ebé mak hato’o hosi Xefe Suku sira katak, Governu atu hadi’a de’it valeta kuak, lixu, bee, estrada, no seluk tan ne’e la kusta, tanba iha 2008, 2009 no 2010.

“Governu aloka ona osan milliaun dólar hodi rezolve problema sira ne’ebé ita rasik kria iha 2006, tanba de’it ita la hatene rona malu no la hanoin sira ne’eb’e mate, raan ne’ebe fakar tanba ita sente katak liberdade maka’as, ita sente ita nia direitu bo’ot liu mundu ne’e tanba ne’e mak akontese problema bo’ot ida”.

Tan ne’e Primeiru-Ministru husu atu ita labele monu tán ba rai kuak hanesan iha tinan 2006, tanba kuandu hanesan ne’e nafatin entaun Ukun-Aan ne’e sei la vale.