Governu Timor-Leste

Ministru Planeamentu no Investimentu Estratéjiku, Gastão Francisco de Sousa, iha loron 18 fulan-setembru tinan 2024, hala’o sorumutu ho Ministru Planeamentu Dezenvolvimentu Nasionál Indonézia nian (BAPPENAS), Suharso Monoarfa, iha Jakarta, ho objetivu atu hametin kooperasaun bilaterál iha área estratéjiku sira.

Durante sorumutu, Ministru Gastão de Sousa hato’o Timor-Leste nia apresiasaun “ba governu Indonézia, liuhosi Ministériu Planeamentu Dezenvolvimentu Nasionál, ba kolaborasaun importante ida-ne’e, tanba fó apoiu ba reforsu sistema investimentu, planeamentu no governasaun ne’ebé integradu”. 

 Gastão Francisco de Sousa destaka importánsia hosi parseria ida-ne’e ho BAPPENAS, hodi rekoñese katak, maski Timor-Leste halo ona “progresu boot iha rekonstrusaun infraestrutura, fortalesimentu kuadru institusionál, konsolidasaun prosesu demokrátiku no dezenvolvimentu rekursus umanus”, país hasoru nafatin “dezafiu importante sira”.

Prioridade hosi “kooperasaun no kolaborasaun ida-ne’e mak estabelese rede aprendizajen no interkámbiu ida hodi fasilita diskusaun polítika no téknika ne’ebé permite troka esperiénsia no solusaun ba dezafiu komún sira, ho foku iha planeamentu infraestrutura, dezenvolvimentu ekonómiku no espesializasaun ba rekursus”, esplika Ministru Gastão de Sousa. 

 Iha tempu badak sei asina Memorandu Entendimentu ida entre país rua ne’e hodi formaliza kooperasaun ida-ne’e, ne’ebé kobre área sira hanesan planeamentu ekonómiku no dezenvolvimentu infraestrutura.