Timor-Leste Reafirma Apoiu Ne’ebé Metin ba Eliminasaun Totál Arma Nukleár no Husu Diálogu Internasionál
Vise-Ministra ba Asuntus ASEAN, Milena Maria da Costa Rangel, iha loron 26 fulan-setembru tinan 2024, partisipa iha Sorumutu Altu Nivel Komemorativa Loron Internasionál nian ba Eliminasaun Total Arma Nukleár, ne’ebé realiza iha Novaiorke, iha ne’ebé nia reafirma “apoiu Timor-Leste nian ne’ebé metin ba eliminasaun total arma nukleár” no apela “ba estadu hotu-hotu, tantu nukleár nune’e mós la nukleár atu promove diálogu konstrutivu ida ne’ebé haburas pás no seguransa internasionál ba hotu-hotu nia di’ak”. 
Durante ninia diskursu, Vise-Ministra destaka “konsekuénsia grave husi teste no produsaun nukleár, ne’ebé tau tebe-tebes iha perigu seguransa umana, inklui impaktu saúde no degradasaun ambientál ba tempu naruk”.
Funu nukleár ida ne’ebé sei iha rezultadu katastrófiku ba umanidade”, nia alerta. Iha kontestu ida-ne’e kona-ba “konflitu globál sira”, “hanesan akontese iha Gaza, Médiu Oriente no Ukránia”, importante tebes maka “rekoñese hamutuk konsekuénsia grave husi teste sira no produsaun nukleár ne’e”.
“Timor-Leste, nu’udar Estadu ida ne’ebé komprometidu ba dezarmamentu no naun proliferasaun, defende kolaborasaun internasionál no kompromisu hamutuk ba abolisaun kompleta arma nukleár sira”. Dezde hahú ninia independénsia, iha tinan 2002, Timor-Leste kompromete ona ba dezarmamentu nukleár ne’ebé asina no ratifika ona iha fulan-setembru tinan 2022, Tratadu ne’e kona-ba Proibisaun Arma Nukleár sira, ne’ebé asume formalmente kompromisu ida-ne’e ho norma internasionál ida ne’ebé esensiál ba pás no seguransa koletiva. 
Vise-Ministra husu “ba Estadu hotu-hotu, liuliu Estadu sira ho Arma Nukleár, atu kumpre no implementa kompletamente sira-nia obrigasaun iha ámbitu Tratadu Naun Proliferasaun Arma Nukleár nian sira” no atu “kontribui ho konstrutivu ba deznuklearizasaun pasifika ida iha mundu”, ho subliña importánsia hodi kria konfiansa no promove ambiente seguransa global ida. 
Milena Maria da Costa Rangel reforsa tan nesesidade hodi “defende prinsípiu sira pás no seguransa nian, hodi favorese negosiasaun diplomátika no solusaun mútua sira.”
Timor-Leste sei kontinua defende dezarmamentu nukleár no buka solusaun diplomátika ne’ebé promove pás no seguransa internasionál, hodi reafirma ninia kompromisu ho mundu ida ne’ebé livre husi arma nukleár sira.
