Governu Timor-Leste

Durante Reuniaun Plenária Altu Nivel kona-ba ameasa ezistensiál sira ne'ebé kauza hosi nivel tasi ne’ebé sae, ne'ebé hala'o iha loron 25 fulan-setembru tinan 2024, iha Novaiorke, Milena Maria da Costa Rangel, Vise-Ministra ba Asuntus ASEAN, destaka konsekuénsia grave sira ne'ebé maka fenómenu ne'e hamosu iha nasaun illa ki'ik sira no área tasi-ibun sira iha mundu tomak. Lori Governu Timor-Leste nia naran, Vise-Ministra alerta kona-ba impaktu konkretu sira ba nasaun ne’e, nomeadamente destruisaun ba infraestrutura no ameasa ba komunidade tasi-ibun sira. 

“Nivel tasi ne’ebé sa’e sai hanesan ameasa boot ida ba ema milloins nia moris no subsisténsia iha mundu tomak,” tenik Vise-Ministra ne’e. “Iha kazu Timor-Leste, ita-nia infraestrutura tasi-ibun, komunidade tasi-ibun no sidade sira hetan ona ameasa no rejista tiha ona lakon no estragu sira ne’ebé reál tanba nivel tasi ne’ebé sa’e.”

Vise-Ministra destaka mós katak “direitu ba sobrevivénsia hosi illa-oan barak sai inserteza”, ho predisaun alarmante sira kona-ba posibilidade lakon hosi nasaun illa ki’ik sira. Iha sentidu ida-ne'e, nia reforsa apelu ba asaun globál, hodi subliña katak esforsu sira hodi hamenus emisaun sira gás ho efeitu estufa nian maka dalan úniku hodi rezolve nivel tasi nian ne'ebé sa'e. 

Nasaun dezenvolvidu sira, tuir Vise-Ministra, “tenke lidera asaun mitigasaun sira”, tuir sira-nia obrigasaun iha ámbitu Konvensaun Kuadru Nasoins Unidas nian kona-ba Mudansa Klimátika (UNFCCC, sigla iha lian Inglés) no Akordu Paris nian. “Nasaun sira ne’ebé menus emisaun tenke kontribui mós ba esforsu koletivu, ne’ebé hili dalan dezenvolvimentu ida ho emisaun karbonu ki’ik, ho konsidera sirkunstánsia nasionál oioin, erradikasaun pobreza no dezenvolvimentu sustentável,” nia hatutan tan. 

Vise-Ministra destaka mós nesesidade urjente ba kooperasaun internasionál hodi reforsa medida adaptasaun sira, liuliu ba Illa Ki’ik sira ne’ebé iha hela Dezenvolvimentu (SIDS, akrónimu iha lian Inglés) no área sira seluk ne’ebé rai-tetuk, atu nune’e bele harii reziliénsia hasoru ameasa sira hosi nivel tasi ne’ebé sa’e. Nia mós argumenta katak “nasaun dezenvolvidu sira tenke kumpre sira-nia obrigasaun tuir UNFCCC no Akordu Paris nian hodi fó apoiu finanseiru ba nasaun sira ne’ebé iha hela dezenvolvimentu atu nune’e bele permite asaun adaptasaun no mitigasaun, hasa’e reziliénsia no responde ba lakon no estragu sira ne’ebé kauza hosi impaktu sira hosi aumentu nivel tasi nian, liu-liu iha kazu Paízes Menus Dezenvolvidus (LDCs, sigla iha lian Inglés) no SIDS”.

Durante nia diskursu, Milena Maria da Costa Rangel anunsia mós kona-ba konkluzaun ratifikasaun Tratadu sobre Konservasaun no Utilizasaun Sustentável Biodiversidade Mariña iha Área Fora Jurisdisaun Nasionál (BBNJ, sigla iha lian Inglés) hosi Timor-Leste, ne’ebé nia konsidera hanesan “marku signifikativu ida iha konservasaun no jestaun sustentável ba rekursu tasi nian hasoru mudansa klimátika no degradasaun tasi nian. Timor-Leste kompriende katak ita-nia oseanu nia saúde ne’e esensiál ba ita-nia sobrevivénsia,” nia deklara.