“Formasaun Rekursu Umanu nian sira hanesan fatór fundamentál atu dada investimentu husi rai liur mai Timor-Leste”
Ministru Ekonomia no Dezenvolvimentu, João Mendes Gonçalves, marka mós nia prezensa, hanesan oradór, ba iha Konferénsia “Enerjia, Dezenvolvimentu no Empregu” ne’ebé mak hala’o iha Lisboa, iha loron 23, fulan Setembru, nu’udar inisiativa kona-ba “Portugal Teknolójiku 2010”.
Timor-Leste mós hola parte iha Konferénsia ida ne’e tanba hetan konvite hosi Ministru Ekonomia, Inovasaun no Dezenvolvimentu Portugal nian, Vieira da Silva, ne’ebé mak koalia kona-ba solusaun hirak inovadora no projetu hirak ne’ebé ho tendénsia teknolojika nian iha área oin-oin hanesan mobilidade eléktrika, enerjia hirak renovável, edukasaun, saúde, komunikasaun, transporte no seguransa.
Inisiativa ida ne’e hetan mós prezensa hosi empreza oin-oin Portugal nian no mós reprezentante Governu nian hosi rai barak-barak hanesan Ministra Turizmu, Indústria no Enerjia Cabo Verde nian, Fátima Fialho. Eventu ida ne’e lori partisipante sira ba fahe esperiénsia la’os deit kona-ba politika enerjétika maibé mós iha área dezenvolvimentu sustentável no kriasaun empregu hanesan fatór estabilidade rikusoin nian.
Ministru Ekonomia no Dezenvolvimentu hasoru malun ho ninia omólugu portugés atu sira nain rua bele koalia kona-ba kestaun hirak hanesan atu promove investimentu iha Timor-Leste, liu hosi dada investidór portugés nian sira hodi koalia kona-ba fatin estratéjiku Timor-Leste nian iha “Sudeste Asiático”, no tanba Timor-Leste koalia lian ofisiál Portugés, mak Ministru koalia katak presija reforsa formasaun rekursu umanu nu’udar fatór fundamentál atu bele afirma no dada investimentu husi rai liur, hodi hato’o mós kona-ba esforsu hirak Governu Konstitusionál ba da-IV hala’o iha kapasitasaun institusionál no rekursu umanu.
João Mendes Gonçalves, molok hola parte iha komitiva Prezidente Repúblika Timor-Leste nian, tau ona iha nia ajenda sorumutu ida ho Ministra ba Traballu no Solidariedade Sosiál Portugal nian, hodi trata asinatura kona-ba Memorandu Entendimentu ida ne’ebé Portugal fó apoiu ba dezenvolvimentu setór kooperativu iha Timor-Leste, liu hosi CASES- Kooperativa António Sérgio ba Ekonomia Sosiál. Ministru sei hala’o mós sorumutu ho Komisáriu Europeu ba Dezenvolvimentu, iha Bruxelas, kona-ba ajuda finanseira ba Timor-Leste no sei iha enkontru oin-oin ho instituisaun no emprezáriu portugés sira, hodi promove no fó sai oportunidade investimentu nian iha Timor-Leste.
