Primeiru-Ministru Xanana Gusmão Lansa ona Livru Fotográfiku Ekonomia Azul iha Nova Iorke
Primeiru-Ministru Kay Rala Xanana Gusmão ofisialmente lansa ona, iha loron 23 fulan-setembru tinan 2024, Livru Fotográfiku Ekonomia Azul ho títulu “Ha’u-nia Tasi, Ha’u-nia Timor” iha The Explorers Club, iha Nova Iorke. 
Livru ne’e produz husi Gabinete Fronteiras Terrestres no Marítimas (GFTM) no nu’udar parte ida husi kampaña Ekonomia Azul nia ho objetivu atu promove dezenvolvimentu sustentável Timor-Leste nia rekursu mariñu hodi diversifika ninia ekonomia. 
Livru fotográfiku “Ha’u-nia Tasi, Ha’u-nia Timor” selebra Timor-Leste nia relasaun espesiál ho tasi. Kada kapítulu husi livru ne’e kaptura imajen furak kona-ba Timor-Leste nia vida mariña ne’ebé mak vibrante no emosionante. Livru ne’e mós hatudu biodiversidade ne’ebé úniku iha Tasi Timor no tradisaun husi bei-ala sira ne’ebé mak liga Timoroan ho natureza no tasi.
Partisipante notável sira inklui oseanugráfu no sientista mariña, fotógrafu, embaixadór no diplomata husi grupu g7+, CPLP, reprezentante sira husi ajénsia Nasoins Unidas, Akadémiku, konservasionista mariña no bainaka sira seluk. 
Iha nia diskursu, Primeiru-Ministru Kay Rala Xanana Gusmão ne’ebé mak lidera Timor-Leste nia dezenvolvimentu Ekonomia Azul, agradese profunda ba apoiu husi partisipante sira iha lansamentu livru ne’e fó ona hodi prezerva no proteje oseanu iha Tasi Timor no iha mundu. 
Lansamentu livru fotográfiku “Ha’u-nia Tasi, Ha’u-nia Timor” akontese iha ámbitu Sesaun Asembleia Jerál Nasoins Unidas ba dala-79, iha ne’ebé Primeiru-Ministru lidera delegasaun Timor-Leste nian no sei hato’o nia diskursu iha loron 27 Setembru. 
