Primeiru-Ministru marka prezensa iha inaugurasaun eskritóriu foun g7+ nian iha Novaiorke
Sekretariadu g7+ simbolikamente inaugura ninia eskritóriu iha Novaiorke, iha serimónia ida ne’ebé partisipa husi Primeiru-Ministru, Kay Rala Xanana Gusmão, no Ministra Planeamentu no Dezenvolvimentu Ekonómiku Serra Leoa no Prezidente g7+, Kenyeh Barlay. Abertura ba eskritóriu foun ida-ne’e ho objetivu atu reforsa koordenasaun entre Estadu-Membru sira no hametin prezensa globál organizasaun nian. 
Fatin foun iha Novaiorke ida-ne’e marka pasu importante ida iha servisu g7+ nian, fornese plataforma ida atu hametin kolaborasaun entre nasaun membru sira no hasa’e efikásia hodi promove sira-nia prioridade sira iha forum internasionál. Sei permite mós promosaun parseria ho organizasoins internasionais, instituisoins akadémikas no parte interesada sira seluk. 
Kria g7+ iha tinan 2010, ho inisiativa hosi nasaun sira ne'ebé frajil no pós-konflitu, durante Diálogu Internasionál dahuluk kona-ba Konsolidasaun Pás no Konstrusaun Estadu, ne'ebé hala'o iha Dili, Timor-Leste, g7+ agora daudaun halibur nasaun 20 hosi Áfrika, Ázia, Médiu Oriente no Pasífiku. Nasaun sira ne’e fahe esperiénsia no promove modelu kooperasaun mútua ida ne’ebé hanaran “Fragile to Fragile Cooperation”, ho objetivu ba dezenvolvimentu sustentável iha área esensiál sira hanesan seguransa, justisa, boa governasaun no jestaun finanseira. 
Timor-Leste, nu’udar membru fundadór, hala’o knaar lideransa nian, nu’udar membru ida ne’ebé ativu liu dezde nia kriasaun. Organizasaun ne'e habelar ona nia influénsia hodi hetan estatutu Observadór iha Nasoins Unidas iha tinan 2019 no rejista nia Karta ba Departamentu Tratadus ONU nian iha tinan 2021.
Ho abertura ba eskritóriu foun, g7+ reforsa nia abilidade atu atua hanesan lian ida ne’ebé unidu hodi naran nasaun sira ne'ebé vulneravel liu, iha kolaborasaun besik ho Nasoins Unidas no parseiru sira seluk, hodi garante katak ninia membru sira-nia prioridade sira integra iha ajenda internasionál sira.
Serimónia inaugurasaun ne’e partisipa mós hosi Ministru Negósius Estranjeirus no Kooperasaun, Bendito dos Santos Freitas, Reprezentante Permanente Timor-Leste ba ONU, Dionísio da Costa Babo Soares no Sekretáriu-Jerál G7+ nian, Hélder da Costa.
