Vise-Ministra ba Asuntus ASEAN Partisipa iha Sorumutu Ministeriál hosi Movimentu País Naun Aliñadu sira iha Nasoins Unidas
Vise-Ministra ba Asuntus ASEAN, Milena Rangel, reprezenta Timor-Leste iha Sorumutu Ministeriál hosi Movimentu País Naun Aliñadu sira, ne’ebé realiza iha sede Nasoins Unidas, iha Novaiorke. Sorumutu ne’e, ho tema “Proteje Ema-Sivíl iha Konflitu Armadu sira: Solidariedade ho Povu Palestinianu”, halibur reprezentante sira hosi Estadu-membru oioin ho objetivu atu hametin defeza ba direitu povu Palestinianu nian no diskute asaun konkretu sira ne’ebé afavór ba pás no seguransa iha rejiaun ne’e. 
Iha ninia intervensaun, Vise Ministra Milena Rangel reafirma kompromisu Timor-Leste nian ba Prinsípiu Sanulu Bandung nian, hodi ko’alia-liu ba papél importante hosi Movimentu Naun-Aliñadu sira ne’ebé defende povu oprimidu sira, liuliu povu Palestinianu. “Pozisaun hosi Movimentu Naun-Aliñadu sira ne’e klaru no la iha dúvida: ita tenke defende direitu povu Palestina nian no garante sira nia protesaun tuir lei internasionál no direitu umanitáriu. Depende ba ita atu hametin esforsu koletivu sira ba asisténsia umanitária no promove diálogu no inisiativa diplomátika sira atu hetan pás no rekonsiliasaun iha rejiaun ne’e”, afirma Vise-Ministra. 
Durante sorumutu ne’e, ko’alia kona-ba estratéjia sira atu intensifika asisténsia umanitária ba Palestina, hodi husu respeitu ba tratadu internasionál sira kona-ba direitus umanus no legalidade internasionál iha área konflitu sira. Milena Rangel destaka mós importánsia hosi solidariedade internasionál hanesan elementu fundamentál ida hodi rezolve konflitu no harii futuru ida ho dame ne'ebé dura ba povu iha rejiaun ne’e.
