Governu Timor-Leste

Sekretáriu Estadu Protesaun Sivíl, Domingos Mariano Reis, Iha loron 20 fulan-setembru tinan 2024, asina Memorandu Entendimentu ida ho Feto ONU hodi promove feto nia partisipasaun no lideransa ne’ebé boot-liu iha Redusaun Riskus Dezastres Naturais no Reziliénsia Klimátika. 

Akordu ne’ebé sei implementa iha tinan tolu nia laran, hahú hosi tinan 2024 to’o 2027, inklui ezekusaun projetu sira iha munisípiu Vikeke, Covalima no Ermera, foka ba inisiativa sira hodi prevene no hamenus riskus dezastres naturais. Bazeia ba memorandu ida-ne’e, Governu Timor-Leste no Feto ONU sei serbisu hamutuk hodi integra perspetiva jéneru iha polítika nasionál kona-ba jestaun dezastre no planeamentu klimátiku. 

Iha nia diskursu, Sekretáriu Estadu, Domingos Mariano Reis, destaka importánsia hosi akordu ida-ne’e no asume katak “durante [ninia] mandatu iha Governu Konstitusionál IX, [nia sei fó] prioridade ba prevensaun no mitigasaun ba riskus dezastres naturais, ne’ebé fó impaktu diretu ba kreximentu ekonómiku família sira nian. Asaun edukasaun kona-ba risku dezastre sira-ne'e esensiál atu hasa'e feto sira-nia koñesimentu kona-ba oinsá atu proteje sira-nia an no sira-nia família." 

Sekretáriu Estadu mós reforsa nesesidade atu mobiliza rekursu hotu-hotu ne’ebé disponivel hodi garante preparasaun ida ne’ebé efikás no resposta ida ne’ebé adekuada ba dezastre sira, hodi subliña importánsia atu feto sira hatene kauza husi dezastres, sinál alerta nomos forma prevensaun no asaun. 

Amy Nishtha Satyam, Xefe Feto ONU iha Timor-Leste destaka relevánsia hosi parseria ida-ne’e, hodi afirma katak “feto sira la’ós de’it vulneravel iha situasaun dezastre, maibé sira mós bele sai ajente ba mudansa”. Liuhusi memorandu ida-ne’e, Feto ONU, iha kolaborasaun ho Sekretáriu Estadu Protesaun Sivíl, sei foka ba dezenvolvimentu rekursus informativus no programa formasaun atu nune’e bele garante katak feto sira iha liña oin ba redusaun riskus dezastres no reziliénsia klimátika.

Memorandu Entendimentu iha objetivu jerál atu promove partisipasaun no lideransa boot-liu hosi feto sira iha redusaun riskus dezastres no reziliénsia klimátika, hodi kontribui ba sustentabilidade meius subsisténsia nian. Entre objetivu espesífiku sira ne’e inklui avansu igualdade jéneru no empoderamentu feto liuhosi prátika ne'ebé sensivel ba jéneru iha jestaun dezastre, fó kbiit ba feto rurál sira nu'udar atór prinsipál iha foti desizaun kona-ba reziliénsia klimátika no hamenus risku ba dezastre sira, hasa'e feto rurál sira-nia asesu ba rekursus naturais hanesan rai no bee-moos , no promove aproximasaun jéneru iha alokasaun rekursus finanseirus relasiona ho dezastre no mudansa klimátika.