Akordu Internasionál Reafirma Kompromisu Timor-Leste nian ba Protesaun Oseanu
Parlamentu Nasionál Timor-Leste iha loron 17 fulan-setembru tinan 2024, aprova ho unanimidade, Proposta Rezolusaun N. 9/VI (1ª), ne’ebé ratifika Akordu iha ámbitu Konvensaun Nasoins Unidas kona-ba Direitu Tasi nian, relasiona ho konservasaun no utilizasaun sustentável ba diversidade biolójika tasi nian iha área sira ne'ebé la sujeita ba jurisdisaun nasionál. Proposta ne’e hetan aprovasaun ho votu afavór 63, sein votu kontra ka abstensaun. 
Sesaun plenária ne’ebé prezide hosi Prezidente Parlamentu Nasionál, Maria Fernanda Lay, sura ho partisipasaun hosi Ministru Agrikultura, Pekuária, Peskas no Florestas, Marcos da Cruz, Vise-Ministra ba Asuntus ASEAN, Milena Maria da Costa Rangel, no hosi Vise-Ministru Asuntus Parlamentares, Adérito Hugo da Costa.
Projetu Proposta Rezolusaun ida-ne’e ba Parlamentu Nasionál molok ne’e hetan ona aprovasaun iha sorumutu Konsellu Ministrus nian iha loron 7 fulan-agostu tinan 2024. Ninia ratifikasaun reforsa kompromisu Timor-Leste nian ba protesaun ambiente tasi no prezervasaun biodiversidade globál. Akordu ida-ne'e nu’udar pasu importante ida ba oin hodi promove konservasaun no utilizasaun sustentável ba rekursu oseániku sira, hodi garante prezervasaun ba ekosistema tasi nian ida ne'ebé saudavel no ekilibradu ba jerasaun futuru sira. 
