Governu Timor-Leste

Ministériu Saúde, liuhosi Diretór-Jerál Servisus Korporativus, Valentino Lisboa Marçal, fó sai iha loron 18 fulan-setembru tinan 2024, katak iha tinan 2025 sei hahú konstrusaun ba ospitál jerál foun tolu iha munisípiu Manufahi, Ermera no Dili. Inisiativa ida-ne'e maka parte ida hosi planu Governu nian atu hadi'a fornesimentu kuidadu saúde ba populasaun liuhosi hametin infraestrutura ospitál nasionál sira.

Tuir Valentino Lisboa Marçal, “iha tinan 2025, tuir planu ne’ebé aprova husi Komité Revizaun Orsamentál ikus nian, ita iha orsamentu besik dolar amerikanu rihun 700 hodi hahú reabilitasaun no konstrusaun ba postu no sentru saúde oin-oin, inklui ospitál jerál foun tolu iha munisípiu Dili, Ermera no Manufahi”.

Diretór-Jerál hatutan tan katak “ekipa enjeñaria sira iha ona terrenu hodi halo levantamentu topográfiku”, no destaka katak “unidade ospitalár Ermera sei iha sala psikiatria ida” no ne’ebé “ospitál jerál Dili foun sei harii iha área merkadu tuan Comoro nian”.

Konstrusaun ba ospitál sira-ne’e reflete kompromisu Governu Konstitusionál IX nian atu hadi’a infraestrutura ospitalár hodi promove servisu médiku sira ho kualidade no asesivel ba populasaun hotu-hotu. Projetu ida-ne’e aliña mós ho implementasaun Polítika Nasionál Saúde no Planu Estratéjiku Nasionál ba Setór Saúde tinan 2011-2030 (PENSS 2011-2030), ne’ebé hakarak atu konsolida vizaun "Timor-Leste saudavel", hodi garante katak sidadaun hotu-hotu iha asesu ba kuidadu saúde esensiál, la haree ba sira-nia kondisaun ekonómika, tuir hatuur ona iha Konstituisaun.

Governu kontinua implementa inisiativa sira iha setór saúde nian, ne’ebé foka ba hadi’a infraestrutura, hametin materiál médiku no lojístiku sira, no otimiza jestaun rekursus umanus, nune’e garante katak servisu sira ne’ebé presta bele hatán ba nesesidade populasaun nian no promove asesu ekuitativu no universál ba kuidadu saúde.