Diálogu no selebrasaun marka vizita Sekretáriu Estadu Formasaun Profisionál no Empregu nian ba komunidade timoroan iha Koreia Súl
Sekretáriu Estadu Formasaun Profisionál no Empregu (SEFOPE), Rogério Araújo Mendonça, hala’o vizita ofisiál ida ba Koreia Súl iha loron 15 to’o 16 fulan-setembru tinan 2024. Iha vizita ne’e, akompaña husi Embaixadór Timor-Leste iha Koreia Súl, Gregório de Sousa, no Kardeál Don Virgílio do Carmo da Silva. Sekretáriu Estadu hasoru malu ho traballadór timoroan sira iha ambiente diálogu no selebrasaun ida, ne’ebé ko’alia-liu kona-ba fortalesimentu komunidade. 
Iha loron 15 fulan-setembru, iha Seul, delegasaun ne’e simu ho ksolok husi traballadór timoroan sira iha selebrasaun kulturál ida. Iha vizita ne’e, traballadór na’in-321 ho sira-nia oan sira partisipa iha serimónia batizmu ida, ne’ebé prezide husi Kardeál Don Virgílio do Carmo da Silva, tuir kedas ho jantár komunitáriu ne’ebé reforsa espíritu fraternidade entre ema sira ne’ebé marka prezensa. 
Iha vizita loron daruak nian, iha loron 16 fulan-setembru, Sekretáriu Estadu partisipa iha Diálogu ho traballadór timoroan sira, iha Asan, hanesan parte ida husi selebrasaun sira aniversáriu Asosiasaun Amicus nian ba dala 14. Durante eventu ne’e, Rogério Araújo Mendonça hahí kna’ar Sindikatu Traballadór Timor-Leste nian iha Koreia Súl (UTTLCS), tanba ninia importánsia hodi fó apoiu ba komunidade, ne’ebé destaka ninia abilidade hodi halo mediasaun no rezolve kestaun sira ne’ebé iha relasaun ho saúde, empregu, no konflitus laborais .
“Sindikatu Traballadór Timor-Leste iha Koreia Súl hala’o ona servisu ezemplár ida hodi apoia ita-nia sidadaun sira ne’ebé servisu iha-ne’e. Kompara ho nasaun sira seluk, ita-boot sira distinge hosi organizasaun no solidariedade ne'ebé ita-boot sira hatudu ba malu. Sindikatu nu’udar mediadór esensiál ida, liuliu iha situasaun difisil sira hanesan kestaun saúde, lakon serbisu ka dezentendimentu laborál,” afirma Sekretáriu Estadu iha nia diskursu. 
Rogério Araújo Mendonça subliña mós importánsia atu kontinua hadi’a kondisaun traballadór sira nian iha estranjeiru, hodi ko’alia kona-ba sujestaun sira ne'ebé aprezenta hosi traballadór sira rasik iha tinan kotuk, ne'ebé rezulta iha asaun konkretu sira hodi hadi'a prosesu administrativu sira no hamenus kustu ne'ebé relasiona ho dokumentasaun laborál.
Sekretáriu Estadu ne’e mós partisipa iha Tasa Amicus ba da-14, kompetisaun desportu ida ne’ebé envolve klube 25 ne’ebé kompostu husi traballadór no estudante Timor Leste iha Koreia Súl. Iha ninia diskursu destaka importánsia desportu nian nu’udar dalan ida atu hametin lasu amizade no unidade entre komunidade timoroan sira iha estranjeiru. “Torneiu ida-ne'e la'ós de'it kompetisaun ida, maibé momentu halibur-malu no kamaradajen nian. Atu espíritu amizade ne’e akompaña ita-boot sira iha área hotu-hotu ita-boot sira-nia moris nian,” enkoraja Sekretáriu Estadu. 
