Ministru Agio Pereira Prepara Vizita Ofisial ba Brunei Hodi Hametin Oportunidade Kooperasaun Iha Setor Petróleu no Gás
Ministru Prezidénsia Konsellu Ministrus, Agio Pereira, hala’o sorumutu ohin, loron 18 fulan-setembru tinan 2024, ho Embaixadór Brunei Darussalam iha Timor-Leste, Wan Hadfi Latif, hodi ko’alia kona-ba kooperasaun entre nasaun rua ne’e, ho foku espesiál ba dezenvolvimentu setór mina no gás. 
Iha enkontru ne’e, Embaixadór fahe informasaun ho Ministru kona-ba dezenvolvimentu aseleradu ba setór petróleu no gás iha Brunei, ne’ebé rejista kreximentu ne’ebé lais tebes iha tinan 10 ikus ne’e. Dezenvolvimentu ida-ne’e destaka hanesan fonte inspirasaun ba Timor-Leste, ne’ebé iha hela faze krusiál negosiasaun kona-ba projetu Greater Sunrise. 
Ministru Agio Pereira agradese tanba partilla ona informasaun no subliña katak “Brunei nia esperiénsia sai hanesan ezemplu ida ne’ebé iha valór ba Timor-Leste, ne’ebé tama daudaun iha faze ida ne’ebé importante tebes ba dezenvolvimentu ninia rekursu enerjétiku sira.”
Durante enkontru ne'e, ko'alia mós kona-ba Ministru Agio Pereira nia vizita ofisiál tuirmai ba Brunei Darussalam, ne'ebé marka ona ba períodu hosi loron 6 to'o 11 fulan-outubru tinan 2024. Vizita ida-ne'e ho objetivu atu hametin relasaun bilaterál, ho énfaze ba enkontru ho Governante importante sira iha Brunei, inklui Vise-Ministru Enerjia, Dato Seri Paduka Awang Haji Mohamad Azmi bin Haji Mohd Hanifah no Ministru Finansas no Ekonomia II, Dato Seri Setia Dr. Mohd Amin Liew bin Abdullah. Vizita ne’e sei permite Ministru Agio Pereira atu hakle’an koñesimentu kona-ba prátika jestaun di’ak-liu iha setór enerjétiku iha Brunei no esplora oportunidade foun ba kooperasaun.
Embaixadór Wan Hadfi Latif sujere mós katak, durante vizita ne’e, Ministru Agio Pereira aproveita hodi vizita kompleksu refinaria no petrokímika ho klase mundiál, ne’ebé lokaliza iha illa Pulau Muara Besar, Brunei, ne’ebé bele sai hanesan modelu referénsia hodi aban-bainrua dezenvolve indústria sira iha Timor-Leste.
