Governu Timor-Leste

Governu, liuhusi Ministériu Asuntus Kombatentes Libertasaun Nasionál, lansa programa validasaun ba rejistu frente esterna/diplomátika durante luta ba libertasaun nasionál. Inisiativa ida-ne’e ho objetivu atu rekoñese, dokumenta no onra kontribuisaun boot frente diplomátika nian iha rezisténsia hasoru okupasaun indonézia, hodi prezerva memória istórika no destaka esforsu timoroan sira nian ne’ebé atua iha senárius internasionais ba ukun-rasik-an.

Frente diplomátika, iha tempu rezisténsia, dezempeña ona papél importante ida iha korredór sira Nasoins Unidas nian no iha kapitál oin-oin iha mundu, hodi garante katak luta Timor-Leste nian ba ukun-rasik an nafatin vizivel no hetan apoiu internasionál.

Maske sai hanesan frente ida ne’ebé nia númeru menus tebes duké frente armada ka klandestina, frente esterna/diplomátika sai desizivu hodi mantein kauza timoroan iha komunidade internasionál nia leet, promove presoins polítikas no diplomátikas ne’ebé ajuda loke dalan ba libertasaun país ne’e.

Serimónia ne’e marka prezensa husi personalidade oioin, inklui Ministru Asuntus Kombatentes Libertasaun Nasionál, Gil da Costa Monteiro “Oan Soru”, Sekretáriu Estadu Veteranus, César dos Santos da Silva, Eis-Primeirus-Ministrus, Mari Bim Amude Alkatiri no Estanislau A. da Silva, Embaixadora Timor-Leste iha Austrália, Inês Almeida,  Embaixadór Timor-Leste iha Brunei Darussalam, Abel Guterres, Prezidente Administrasaun Konsellu Kombatentes Libertasaun Nasionál, Vidal de Jesus “Riak Leman”, Eis-Ministru Roque Rodrigues, no Embaixadora Pascoela Barreto.