Ministru Justisa lidera reuniaun Komisaun Nasionál Kombate Brankeamentu Kapitál no Finansiamentu Terrorizmu
Ministru Justisa, Sérgio de Jesus Fernandes da Costa Hornai, iha loron 16 fulan-Setembru tinan 2024, nu’udar Ko-prezidente Komisaun Nasionál Kombate Brankeamentu Kapitál no Finansiamentu Terrorizmu (CNCBC, Sigla iha Lian Portugés), prezide enkontru ne’e iha Ministériu Justisa, ho objetivu atu aprova kestaun estratéjiku sira ne'ebé relasiona ho partisipasaun Timor-Leste nian iha enkontru anuál tuirmai hosi Grupu Ázia/Pasífiku kona-ba Brankeamentu Kapitál (APG), ne'ebé sei hala'o iha Abu Dhabi, hosi loron 22 to’o loron 27 fulan-setembru tinan 2024. 
Iha sorumutu ne’e, aprezenta Relatóriu Avaliasaun Mútua (MER) daruak nian, ne’ebé Timor-Leste sei submete ba sesaun plenária APG. Avaliasaun ida-ne’e, dahuluk dezde 2012, ho objetivu atu hatudu kompromisu polítiku no lejizlativu Timor-Leste nian hodi prevene no kombate brankeamentu kapitál no finansiamentu terrorizmu, nomós reafirma kompromisu nasionál ne’ebé metin hodi kumpre padraun internasionál sira iha área ida-ne’e.
Iha ninia diskursu, Ministru Justisa subliña katak aprezentasaun ida-ne’e hanesan oportunidade importante ida atu hatudu avansu signifikativu ne’ebé Timor-Leste alkansa ona iha tinan hirak ikus ne’e hodi kombate prátika kriminozu sira-ne’e, liuliu ho produsaun lejizlasaun no kriasaun instituisaun sira, hanesan Polísia Sientífika Investigasaun Kriminál, ne'ebé serbisu iha asuntu ida-ne'e.
Diretora Unidade Informasaun Finanseira, Maria Sarmento, nu’udar Koordenadora ekipa nasionál ne’ebé responsavel ba Relatóriu Avaliasaun Mútua, halo aprezentasaun detallu ida kona-ba tema prinsipál sira ne’ebé sei diskute iha plenária APG. Entre tópiku hirak-ne’e, mak estabelesimentu Orden Advogadus, kooperasaun polisiál iha investigasaun kriminál hasoru aktu terrorizmu, supervizaun ba organizasaun sein fin lukrativu no fin lukrativu, no mós kestaun sira ne’ebé relasiona ho kazinu no dadus estatístikus.
Anúnsiu mós katak Governadór Banku Sentrál Timor-Leste, Helder Lopes, sei lidera delegasaun timoroan durante enkontru APG iha Abu Dhabi, iha ne'ebé sei aprezenta rezultadu nasionál sira iha kombate brankeamentu kapitál no finansiamentu terrorizmu.
Benjamim de Araújo e Côrte-Real, hosi Unidade Informasaun Finanseira, no Nelinho Vital, hosi Ministériu Justisa, hetan nomeasaun hodi reprezenta Timor-Leste iha Grupu Traballu ASEAN nian kona-ba Kombate Brankeamentu Kapitál no Finansiamentu Terrorizmu, ne’ebé mós sei hasoru malu iha Abu Dhabi.
Enkontru ne’e hetan partisipasaun husi membrus CNCBC, Ministériu Negósius Estranjeirus no Kooperasaun, Ministériu Públiku, Polísia Sientífika Investigasaun Kriminál, Banku Sentrál, Komisaun Funsaun Públika, Ministériu Interiór, Komisaun Anti Korrupsaun, Polísia Nasionál Timor-Leste, Unidade Informasaun Finanseira no SERVE IP.
