Governu Timor-Leste

Governu Repúblika Populár Xina, liuhosi ninia embaixada iha Timor-Leste, entrega ofisialmente autokarru rua ba Governu Timor-Leste, iha serimónia ne’ebé hala’o iha Ministériu Negósius Estranjeirus no Kooperasaun, Dili. Karreta hirak ne’e entrega husi Embaixadora Xina iha Timor-Leste, Wan Wenli, ba Ministru Negósius Estranjeirus no Kooperasaun, Bendito dos Santos Freitas. 

Ministru Bendito Freitas salienta katak “veíkulu ho kualidade aas sira ne’e bele uza iha eventu importante no hodi tula ema-boot sira” no destaka mós katak relasoins entre Timor-Leste no Xina hahú kedas iha períodu luta ba independénsia, no kooperasaun ne’e hametin ona iha tinan hirak nia laran, ho apoiu iha área oioin, inklui Timor-Leste nia prosesu adezaun ba ASEAN. 

Embaixadora Wan Wenli fó-hanoin katak doasaun autokarru hirak-ne’e iha ona akordu durante vizita ofisiál Ministru Bendito Freitas ba Xina, ne’ebé hala’o tuir konvite husi Ministru Negósius Estranjeirus Xina, Wang Yi. Embaixadora ne’e hato’o esperansa katak “veíkulu luxu sira-ne’e bele utiliza iha atividade diplomátika no vizita Estadus nian iha Timor-Leste”. 

 “Timor-Leste nu’udar nasaun joven ida, maibé destaka tebes iha kampu diplomátiku, ho atividade barak ne’ebé lidera husi Prezidente José Ramos-Horta, Primeiru-Ministru Kay Rala Xanana Gusmão no Ministru Bendito dos Santos Freitas”, hatutan Embaixadora.