Bolseiru 92 hosi Programa Bolsas Méritu 2024 nian Prepara atu Estuda iha Rai-li'ur
Iha loron 13 fulan-setembru tinan 2024, estudante timoroan hamutuk na'in-92 halo despedida iha serimónia ida ne'ebé hala'o iha salaun Delta Nova, molok halo viajen ba nasaun lima ne'ebé sira sei kontinua sira-nia estudu, iha ámbitu Programa Bolsas Méritu 2024 nian. 
Programa ne’e, hanesan inisiativa ida hosi Governu Konstitusionál IX hodi promove dezenvolvimentu rekursu umanu nasionál iha área estratéjiku sira, ne’ebé koordena hosi Ministériu Planeamentu no Investimentu Estratéjiku no jere hosi Fundu Dezenvolvimentu Kapitál Umanu (FDCH, Sigla iha Lian Portugés). Tinan ida-ne’e, bolseiru sira sei iha oportunidade atu hakle’an sira-nia koñesimentu iha instituisaun akadémika sira iha nasaun sira tuirmai ne’e: Portugál: estudante na’in-21 (na’in-4 iha programa Doutoramentu no na’in-17 iha Mestradu); Brazil: estudante na'in-14 (Mestradu); Indonézia: estudante na’in-16 (Lisensiatura); Malázia: estudante na'in-31 (13 iha Mestradu no 18 iha Lisensiatura); no Tailándia: estudante na'in-10 (Mestradu). 
Durante serimónia ne’e, estudante sira simu liafuan motivasaun husi personalidade oioin ne’ebé marka prezensa, inklui Ministru Planeamentu no Investimentu Estratéjiku no Prezidente Konsellu Administrasaun FDCH, Gastão Francisco de Sousa, no Ministru Ensinu Superiór, Siénsia no Kultura, José Honório da Costa Pereira Jerónimo, ne’ebé destaka importánsia formasaun joven sira ba dezenvolvimentu sustentável Timor-Leste nian. 
Aleinde membru Governu sira, marka mós prezensa embaixadór Malázia no Kuba, reprezentante embaixada Brazil no Indonézia, Prezidente Komisaun Funsaun Públika, nomós família bolseiru sira nian.
