Primeiru-Ministru Sei Partisipa iha Asembleia Jerál Nasoins Unidas ba dala 79 iha Novaiorke
Primeiru-Ministru, Kay Rala Xanana Gusmão, sei auzente iha Timor-Leste hosi loron 18 to’o loron 30 fulan-setembru tinan 2024, hodi partisipa iha Sesaun Asembleia-Jerál Nasoins Unidas, ne’ebé sei hala’o iha Novaiorke, Estadus Unidus Amérika.
Sesaun ba dala 79 Asembleia Jerál Nasoins Unidas nian, ne'ebé hahú iha loron 10 fulan-setembru tinan 2024 no iha loron dahuluk hosi Debate Jerál nivel altu nian iha loron 24 fulan-Setembru, sei foka ba tema: “Labele husik ema ida iha kotuk: Atua hamutuk atu promove dame, dezenvolvimentu sustentável no dignidade umana ba jerasaun agora no aban-bainrua nian.”
Iha Simeira Futuru, ne’ebé sei hala’o hosi loron 22 to’o 23 fulan-setembru, Primeiru-Ministru Xanana Gusmão no lider mundiál sira seluk sei halibur malu hodi diskute dezafiu krítiku sira iha governasaun globál. Simeira ne’e ho objetivu atu reafirma kompromisu sira ho Objetivu Dezenvolvimentu Sustentável no Karta Nasoins Unidas nian, nomós hametin kooperasaun no harii baze sira hodi hamoris filafali sistema multilaterál. Simeira ne’e sei rezulta iha Paktu ba Futuru, ne’ebé ho objetivu atu hametin kooperasaun globál no adapta ho efetivu ba dezafiu atuál sira ba ema hotu nia di’ak.
Asembleia Jerál Nasoins Unidas mak organizasaun nia órgaun prinsipál ne'ebé halo polítika, no fornese forum ida ba diskusaun multilaterál kona-ba espektru tomak hosi asuntu internasionál sira ne'ebé inklui iha Karta Nasoins Unidas nian. Estadu-membru 193 ida-idak iha votu hanesan.
Durante Primeiru-Ministru nia auzénsia, Vise-Primeiru-Ministru no Ministru Koordenadór Asuntus Ekonómikus, Francisco Kabualdi Lay, mak sei halo koordenasaun Governu.
