Primeiru-Ministru lansa Planu Estratéjiku ba Setór Finanseiru iha aniversáriu Banku Sentrál nian ba dala 13
Primeiru-Ministru, Kay Rala Xanana Gusmão, lansa Planu Estratéjiku ba Dezenvolvimentu Setór Finanseiru Banku Sentrál Timor-Leste (BCTL, Sigla iha Lian Portugés) nian ba períodu tinan 2025-2035. Lansamentu ne'e hala’o durante selebrasaun aniversáriu BCTL nian ba dala-13, iha Salaun Multiuzu GMN, Dili, iha loron 13 fulan-setembru tinan 2024. 
Iha ninia diskursu, Primeiru-Ministru subliña importánsia husi Banku Sentrál no jestaun di’ak ba finansas públikas, hodi destaka katak “osan povu nian tenke jere ho di’ak. Iha prosesu harii Estadu no Nasaun, mosu problema, maibé esensiál hadi’a problema sira ne’e, tanba, iha tinan hirak liubá, sistema finanseiru hetan prejuízu tanba laiha jestaun adekuada ba fundu Estadu nian”. Primeiru-Ministru hatutan tan katak "Banku Sentrál iha responsabilidade atu jere osan povu nian, ne'ebé hanesan raan Estadu, setór privadu no povu tomak nian. Karik raan ne'e 'kontaminadu', ita gasta rekursu hodi purifika raan ne’e; se la iha raan, ita mate sedu; no se barak liu, ita sai bokur la halo buat ida. Ida-ne’e mak importánsia hosi finansas, no Banku Sentrál dezempeña papél fundamentál ida iha ninia jestaun”. 
Governadór BCTL, Hélder Lopes, realsa katak “BCTL nia misaun mak atu kontrola no garante estabilidade folin liuhosi polítika monetária, dezenvolve no halo supervizaun ba setór finanseiru, hadi’a sistema pagamentu nasionál no jere investimentus Fundu Petrolíferu nian”.
Kona-ba Fundu Petrolíferu, Hélder Lopes relata katak, to’o fulan-jullu 2024, saldu hamutuk dolar amerikanu millaun rihun 18,65, ho totál retornu investimentu nian hamutuk dolar amerikanu millaun 950. Reseitas husi mina no gas hamutuk de’it dolar amerikanu millaun 70, no levanta ona dolar amerikanu millaun 650 hodi finansia despeza Estadu. Banku Sentrál hein katak merkadu finanseiru internasionál favorese nafatin estratéjia investimentu Timor-Leste nian, hodi permite taka tinan ne’e ho saldu liu dolar amerikanu biliaun 18 iha Fundu Petrolíferu.
Planu Estratéjiku ba Dezenvolvimentu Setór Finanseiru ho objetivu atu fó ba Timor-Leste indústria finanseira ida ne’ebé estavel, asesivel no modernu, ne’ebé kontribui ba dezenvolvimentu ekonómiku ida ne’ebé diversifikadu, inkluzivu no sustentável. 
Planu Estratéjiku ida-ne’e estrutura iha pilár prinsipál haat: 1) garante rekursu finanseiru ba dezenvolvimentu, 2) promove sistema pagamentu ida ne’ebé modernu, 3) hadi’a asesu ba finansiamentu, no 4) moderniza setór finanseiru.
“Vizaun, objetivu no meta sira husi Planu Estratéjiku ida-ne’e sei alkansa bainhira, hamutuk, ita implementa estratéjia sira ne’ebé define ona. Tanba ne’e, hamutuk ita implementa, hamutuk ita buras”, konklui eis Vise-Ministru Finansas ne’e.
Durante selebrasaun aniversáriu, BCTL entrega “Prémiu Banku Sentrál” ba tinan ida ne’e ba ninia kolaboradór sira hotu, nu’udar rekoñesimentu ba sira-nia kompromisu no kontribuisaun.
Iha serimónia ne’e hetan partisipasaun hosi membru Governu balun, deputadu Parlamentu Nasionál, reprezentante korpu diplomátiku, no mós instituisaun finanseira no setór privadu. 
