Governu Timor-Leste

Selebrasoins ba aniversáriu Forsa Internasionál ba Timor-Leste (INTERFET) ba dala 25 kontinua ohin dadeer, loron 14 fulan-setembru tinan 2024, ho desfile ida, hahú husi Portu Dili to’o Palásiu Prezidensiál Nicolau Lobato. Desfile ne’e hetan partisipasaun husi eis membrus INTERFET, veteranu timoroan, reprezentante Governu no bainaka internasionál sira. 

Hafoin remata desfile, hala’o serimónia bensan ba Memoriál INTERFET, ne'ebé lokaliza iha antigu eliportu forsa manutensaun pás nian, iha Palásiu Prezidensiál nia sorin. Serimónia ne’e marka inísiu ofisiál ba konstrusaun Memoriál no Muzeu Internasionál INTERFET nian, ne’ebé sei fó onra ba INTERFET nia papél importante hodi harii hikas pás no estabilidade iha Timor-Leste. 

Iha ninia diskursu, Ministru Agio Pereira destaka importánsia istórika husi projetu ida-ne’e, hodi afirma katak “memoriál ida-ne’e sei sai símbolu aten-barani, solidariedade no esperansa nian ne’ebé lori tempu naruk. La'ós de'it atu komemora pasadu, maibé mós nu'udar matadalan atu inspira jerasaun sira iha futuru. Ohin, ho bensan ida-ne’e, ita hahú konstrusaun ba espasu ida ne’ebé sei dedika memória ema sira ne’ebé luta ba pás no justisa iha Timor-Leste”.

“Timor-Leste hahú ona jornada naruk husi kedas inísiu. Povu Timor nia reziliénsia no forsa nakfila rai ida ne’ebé uluk hasoru adversidade boot sai nasaun ida ne’ebé prósperu. Progresu ida-ne’e hanesan omenajen ida ba INTERFET nia esforsu koletivu no parseria ne’ebé lori tempu naruk entre Timor-Leste no Komunidade Internasionál”, destaka Ministru.

Governante ne’e afirma katak “Tinan ruanulu-resin-lima liubá, hodi hatán ba apelu urjente ba pás no estabilidade, INTERFET – forsa internasionál ida ne’ebé kompostu hosi mane no feto aten-barani sira hosi mundu tomak – hakat ba oin hodi fó apoiu ba povu Timor-Leste. Sira-nia misaun la'ós de'it operasaun militár, maibé espresaun solidariedade no kompromisu ne’ebé kle’an ba direitus umanus no justisa”. 

Ministru Agio Pereira hatutan liután katak “aniversáriu ida-ne’e la’ós de’it momentu ida atu fó onra ba pasadu, maibé mós oportunidade ida atu hafoun fali ita-nia dedikasaun ba jornada ne’ebé la’o daudaun kona-ba pás no harii nasaun no apoiu ba Timor-Leste. Mai ita selebra saida maka ita halo ona iha pasadu, enkuantu hateke ba futuru ho esperansa no determinasaun”.

Nia hakotu nia diskursu hodi espresa ninia dezeju atu “fatin ida-ne'e hetan bensan ho naroman esperansa no espíritu unidade nian” ne’ebé define misaun no halo kompromisu ida “ba serbisu ne'ebé la'o hela hodi harii mundu ida ne'ebé justu no pasífiku”.

Iha lokraik komemorasoins sei kontinua ho jogu futsal no konsertu, hosi tuku 16:30 to’o 20:30. Iha kampu futsal ne’ebé besik Palásiu Prezidensiál, jogu dahuluk, entre ekipa femininu, ne’ebé Ministériu Defeza no Forsas Defeza Timor-Leste (F-FDTL) maka sei hasoru malu, no jogu daruak mak ekipa Timor-Leste no ekipa Nasoins Unidas nian maka sei hasoru malu.

Konsertu ne’e sei konta ho atuasaun husi banda oioin, inklui Smith Brothers, Ezérsitu Australianu, F-FDTL & Gurkhas, no Dili All Stars.

Komemorasoins sei termina iha loron 20 fulan-setembru, ho serimónia solene ida iha Sede Konsellu Kombatentes Libertasaun Nasionál (CCLN, Sigla iha Lian Portugés), tuir fali ho torneiu futsal entre veteranus nasionais no antigus membrus INTERFET nian.