Governu Timor-Leste

IV Governu Timor-Leste fó importansia bo’ot ba desenvolvimentu setór privadu ne’ebé di’ak liu, empreza mikro ne’e ki’ik maka sei sai hanesan motor ba dezenvolvimentu ne’ebé sustentavel no mós ba kriasaun empregu. Nune’e maka Governu iha komitmentu atu ultrapasa obstaklu no dezafiu hirak ne’ebé empata ninia konsolidasaun no desenvolvimentu, maka liu hosi  Ministru Ekonomia no Desenvolvimentu, João Mendes Gonçalves no Director Irish-Aid, Eoghan Walsh, assina akordu ida ho inisia projetu Business Opportunities and Support Services (BOSS).

Governu Irlandia liu hosi Ajensia desenvolvimentu Irish-Aid fó ajuda fundu orsamentu ba Projetu BOSS total orsamentu Euro 5.850.000 (US$ 7.758.624) ba Ministériu Ekonomia no Desenvolvimentu atu fó ba iha IADE, ne’ebé Organizasaun Internasionál ba Traballu (OIT) maka sei ezekuta durante tinan ha’at, iha Segunda Feira, 20 de Setembru, tinan 2010.

Projetu ne’e sei fó apoiu ba Institutu Apoio ba Desenvolvimentu Empresariál (IADE) no Diresaun Nasionál Desenvolvimentu Rural (DNDR), atu bele haburas desenvolvimentu ekonomia lokal hodi hametin prestasaun servisu Governu nian no kria empregu ne’ebé iha kualidade iha área rural. Ida ne’e hala’o liu hósi halo luan asesu merkadu ba negosiu ki’ik, haforsa kontrator lokal no fó asisténsia desenvolvimentu negosiu nian.

Projetu BOSS nia objetivu maka atu haluan merkadu ba negosiu ki’ik liu hosi abordazen partisipatoriu lokal, ho intensaun ida ne’e, maka projetu sei apoia implementasaun inisiativa Desenvolvimentu Ekonomia Lokal (DEL), atu garante asesu ne’ebé di’ak liu ba merkadu, produtu no asisténsia lokal.

Ho asistánsia desenvolvimentu negosiu ne’ebé efetivu maka hanesan objetivu daruak hosi projetu BOSS, nune’e mós Sentru Desenvolvimentu Emprezarial sei fó formasaun kona-ba jestaun negosiu no akolhamentu bazeia ba nesesidade emprezariu sira nian no sei estabelese sistema informasaun no promosaun negosiu iha nasaun laran.

Projetu ne’e sei fó konsentrasaun partikular hodi hadi’ak kapasidade kontrator lokal hodi bele implementa projetu Governu nian efetivamente hanesan reabilitasaun infraestratura iha área rurál.