Governu Timor-Leste

Palásiu Prezidensiál Nicolau Lobato sai uma-na’in ba Komemorasaun aniversáriu Forsa Internasionál ba Timor-Leste (INTERFET, sigla iha lian inglés) nian ba da-25 ho palestra lubun ida ho nia tema “Konfigurasaun Intervensaun INTERFET: Kazu Timor-Leste nian”. Eventu ida-ne’e, Prezidente Repúblika, José Ramos-Horta maka promove, konta ho partisipasaun husi Primeiru-Ministru, Kay Rala Xanana Gusmão, nu’udar oradór, no Ministru Prezidénsia Konsellu Ministrus, Agio Pereira maka modera sesaun diskusaun ne’e. 

Sesaun palestra ne’e hanesan parte integrante husi Presidential Lecture Series, halibur distintu oradór internasionál sira ne’ebé dezempeña papél fundamentál durante intervensaun INTERFET nian. Entre oradór sira ne’ebé partisipa ne’e maka Profesór David Kilcullen; Prezidente José Ramos-Horta, Tamrat Samuel, antigu reprezentante ONU iha Timor-Leste; Embaixadór Fernando d’Oliveira Neves, husi Portugal; Embaixadór Dino Patti Djalal, husi Indonézia; Penelope Wensley AC, eis-Governadora-Jerál Austrália; Major-Jenerál Michael Smith AO, no Jenerál Sir Peter Cosgrove AK CVO MC, ne’ebé lidera INTERFET iha tinan 1999.

Primeiru-Ministru Kay Rala Xanana Gusmão mós fahe reflesaun kona-ba momentu importante ida-ne’e iha istória Timor-Leste nian, hodi foka-liu kona-ba INTERFET ne’ebé sai modelu ida ba operasaun manutensaun pás nian iha mundu tomak. 

Eventu ida-ne’e fó oportunidade ida ba oradór konvidadu sira hodi reflete kona-ba sira-nia kontribuisaun no ema ida-idak nia perspetiva molok no durante INTERFET, no ba joven lider timoroan sira atu rona rasik kona-ba sakrifísiu sira ne’ebé jerasaun anteriór sira halo ona.

Komemorasaun sira ne’e sei kontinua aban ho desfile ida, hahú husi Portu Dili to’o Palásiu Prezidensiál, tuir ho bensan Memoriál INTERFET nian, ne’ebé lokaliza iha eliportu tuan ne’ebé forsa pás nian uza besik iha Palásiu Prezidensiál. Atividade sira-ne’e sei hala’o husi tuku 7:00 to’o tuku 10:00 dadeer, Prezidente Repúblika, José Ramos-Horta maka sei halo abertura ofisiál no Ministru Agio Pereira no antigu Komandante INTERFET, Martyn Dun, maka sei halo diskursu iha inaugurasaun memoriál ne’e.

Husi tuku 16:30 to’o tuku 20:30, sei iha jogu futsal no konsertu iha Palásiu Prezidensiál no iha kampu futsal ne’ebé besik. Jogu dahuluk, futeból femininu, ne’ebé Ministériu Defeza no F-FDTL maka sei hasoru malu, no jogu tuirmai ekipa Timor-Leste no ekipa Nasoins Unidas maka sei hasoru malu. Konsertu ne’e sei konta ho atuasaun husi banda Smith Brothers, Ezérsitu Australianu, F-FDTL & Gurkhas, no Dili All Stars.

Iha loron 20 fulan-setembru, data ne’ebé INTERFET to’o iha Timor-Leste, sei komemora loron ne’e iha Sede Konsellu Kombatentes Libertasaun Nasionál (CCLN, Sigla iha Lian Portugés), serimónia solene ida no torneiu futsal entre veteranus nasionais no antigus membrus INTERFET nian, hahú husi tuku 8:00 to’o 11:30.