Governu Timor-Leste

Governu Konstitusionál IX, liuhosi Rezolusaun Governu n. 51/2024, loron 13 fulan-setembru tinan 2024, hato’o ninia rekoñesimentu no agradesimentu kle’an ba kontribuisaun folin-boot hosi joven sira, funsionáriu públiku, forsa defeza no seguransa, mídia no hosi populasaun ein-jerál, iha organizasaun no partisipasaun ativa iha selebrasaun sira Vizita Apostólika Sua Santidade Papa Francisco nian mai Timor-Leste, ne’ebé akontese hosi loron 9 to’o loron 11 fulan-setembru tinan 2024. 

Durante Sua Santidade nia vizita istórika ne’e, nasaun asiste mobilizasaun ida ne’ebé boot no entuziazmu, ne’ebé habelar husikedas resesaun ne’ebé ho ksolok tebes to’o despedida ida ne’ebé emosionál. Governu Konstitusionál IX haksolok ba “partisipasaun signifikativa no kolaborasaun ativa hosi populasaun ein jerál, no liuliu joven sira, iha selebrasaun hotu-hotu durante vizita Sua Santidade Papa Francisco nian”.

Ezekutivu destaka no hahí dedikasaun no kompromisu hosi ema hotu ne’ebé envolve iha preparasaun no organizasaun selebrasaun nian sira, hodi destaka “serbisu preparasaun exelente” “hosi komisaun organizadora no ema hotu ne’ebé kolabora iha ne’ebá”. Agradese mós ba asaun koordenada hosi Forsa Defeza Timor-Leste (F-FDTL) no Polísia Nasionál Timor-Leste (PNTL), ne’ebé, iha ámbitu Kompromisu Operasionál Konjuntu, garante seguransa ba eventu hotu-hotu, hodi permite selebrasaun sira hala'o iha ambiente ida ho orden no hakmatek. 

“Serbisu kobertura notísia nian hosi mídia sira durante vizita Sua Santidade Papa Francisco nian mai Timor-Leste” hetan mós rekoñesimentu, ne’ebé garante kobertura notísia abranjente no ho kualidade, hodi hato’o ba mundu importánsia husi vizita ida-ne’e ba povu timoroan.  

Tanba ne’e, Governu Timor-Leste hato’o agradesimentu no rekoñesimentu sinseru ba sira hotu ne’ebé kontribui ba susesu okaziaun istóriku ne’e no louva “espíritu unidade, ambiente festa no dame ne’ebé prevalese iha territóriu nasionál tomak, ne’ebé reflete fiar hosi Povu timoroan no ambiente ne’ebé armonia iha rai laran tomak”.