Governu Timor-Leste

Sentru Formasaun Profisionál Brasil-Timor-Leste, loron 16 fulan Setembru, iha Bekora, Díli, halo-tan graduasaun ba formadór sira hamutuk 185 formadu, iha área karpintaria, kostura, eletrisidade, hidráulika, informátika, makinaria, panifikasaun no konstrusaun.

Iha okaziaun ne’e Sekretáriu Estadu ba Formasaun Profisionál no Empregu, Bendito Freitas, hateten katak ne’e hanesan sinál bo’ot ida kontribuisaun Governu Brasil ba Timor-Leste liu hosi kapasitasaun rekursu umanu iha nivel tékniku profisionál. Governu Brasil liu hosi “Agência Brasileira de Cooperação” (ABC) forma ona juventude Timor-Leste iha área barak no konsege hetan ona formandu hamutuk 1.857 alunu hahú hosi 2001 to’o agora.

Bendito Freitas hatutan katak objetivu husi gradusaun ne’e, atu graduandu sira bele kontribui ba investimentu iha prosesu dezenvolvimentu nasionál iha área konstrusaun nian, ne’ebé tuir pólitika Governu nian ba futuru atu bele dezenvolve servisu ho kualidade no responsabilidade. Ne’ebé Timor-Oan mak tenki partisipa iha “Mão de Obra” ne’e rasik no rekoñese mós katak dezempregu sai hanesan polémika globál iha mundu tomak inklui Timor-Leste. Governu liu hosi Sekretaria Estadu ba Formasaun Profisionál no Empregu (SEFOPE) fasilita nafatin no fó tulun ba juventude sira atu bele kapasita no hadi’a sira nian abilidade atu bele hatán ba ijijénsia no nesesidade merkadu nian.

Governu Brasil liu hosi Embaixadór ba Timor Leste hatutan katak Governu Brasil haksolok tebes haree rezultadu servisu koperasaun téknika entre “Agência Brasileira de Cooperação (ABC)” servisu hamutuk SEFOPE hodi promove Sentru Formasaun Profisional Brasil-Timor- Leste. Embaixadór hatutan tan katak Prezidente Repúblika Brasil Lula rasik halo ona vizita mai iha Sentru Formasaun Profisionál Brasil – Timor-Leste no Prezidente Lula dehan katak Governu Brasil iha vontadi bo’ot atu fó tulun nafatin ba Sentru Formasaun Profisionál Brasil – Timor-Leste.