Governu Timor-Leste

Primeiru-Ministru, Kay Rala Xanana Gusmão, akompaña husi Ministru Prezidénsia Konsellu Ministrus, Agio Pereira, no husi Sekretáriu Estadu Komunikasaun Sosiál, Expedito Dias Ximenes, lokraik ne’e, hala’o sorumutuk ho líderes Igreja Katólika iha Timor-Leste, Prezidente Konferénsia Episkopál Timorense (CET, sigla iha lian portugés), Dom Norberto do Amaral, Bispu Dioseze Maliana, Arsebispu Arkidioseze Dili, Kardeál Dom Virgílio do Carmo da Silva, Bispu Baucau, Dom Leandro Maria Alves, no Reprezentantes Santa Sé nian iha Timor-Leste, Monseñór, Marco Sprizzi, hafoin Sua Santidade Papa Francisco nia partida. 

Iha konferénsia imprensa ne’ebé realiza hafoin sorumutu ne’e, Xefe Governu esplika katak, iha sorumutu ne’e, rekoñese ézitu serbisu hamutuk entre Governu no Igreja, ne’ebé hamosu iha susesu vizita Sua Santidade Papa Francisco nian. Primeiru-Ministru destaka mós partisipasaun boot husi populasaun no, liuliu, elojia foin-sa’e sira ba sira-nia komportamentu ezemplár, hodi subliña katak timoroan sira “kontinua hatudu kapasidade atu kria armonia, la’ós-violénsia no domin, nune’e promove fraternidade umana iha país ne’e”.

Kardeál Dom Virgílio do Carmo da Silva hato’o ninia laran-ksolok no gratidaun boot ba “esforsu hamutuk” husi ema hotu ne’ebé envolve, ne’ebé ikusmai iha susesu vizita papál nian. Nia mós elojia “maturidade povu no foin-sa’e sira nian”, hodi felisita, hamutuk ho Governu, “ema fiar-na’in sira hotu no populasaun tomak” ba sira-nia kontribuisaun iha momentu istóriku ida-ne’e. 

Sua Santidade Papa Francisco ohin konklui vizita apostólika durante loron tolu iha Timor-Leste, ne’ebé durante ne’e populasaun simu Santu Padre ho entuziasmu boot, ho ema rihun ba rihun akompaña pasajen Papa Francisco iha dalan sira sidade Dili nian. Pontu importante husi vizita ne’e maka selebrasaun misa iha Tasi-Tolu, ne’ebé sura ho prezensa ema besik rihun 600.