Sua Santidade Papa Francisco Hahu Vizita iha Timor-Leste
Sua Santidade Papa Francisco to’o ohin, loron 9 fulan-setembru tinan 2024, iha Aeroportu Internasionál Prezidente Nicolau Lobato, iha Dili, tuku 2:10 lokraik, ne’ebé simu husi Prezidente Repúblika, José Ramos-Horta, husi Primeiru-Ministru, Kay Rala Xanana Gusmão, husi Kardeál Virgílio do Carmo da Silva no Bispu sira Timor-Leste nian, Dom Norberto do Amaral e Dom Leandro Maria Alves, no reprezentante Santa Sé iha Timor-Leste, Monsenhor Marco Sprizzi, no mós membrus Governu no mós autoridade nasionál no relijioza sira seluk.
Hafoin nia to’o, Papa Francisco bá iha Nunsiatura Apostólika, iha Motael, iha ne’ebé nia sei hela durante ninia permanénsia iha Timor-Leste, no hetan saudasaun husi ema rihun ba rihun durante perkursu.
Ohin, tuku 6 lokraik, sei iha serimónia ofisiál benvindu iha Palásiu Prezidensiál Nicolau Lobato, ne’ebé Sua Santidade sei simu husi Prezidente Repúblika. Hafoin, Papa Francisco sei iha enkontru ida ho reprezentante sira Governu nian, sosiedade sivíl no korpu diplomátiku nian, durante ne'e nia sei halo diskursu ida.
Aban, loron 10 fulan-setembru, Amu-Papa Francisco sei hahú loron ho vizita ida ba Konventu Irmán Alma sira-nian, iha tuku 8:45 dadeer, nia sei fahe momentu ida ho labarik sira ho defisiénsia. Tuir mai, tuku 9:30 dadeer, sei iha enkontru ho bispu, padre, madre no seminarista sira iha Katedrál Imakulada Konseisaun, iha Dili.
Destake husi vizita ne’e sei selebrasaun Santa Misa Solene, ne’ebé prezide husi Sua Santidade, katak sei hala’o iha Tasi Tolu, tuku 4:30 lokraik.
Iha loron ikus vizita nian, loron 11 fulan-setembru, Sua Santidade Papa Francisco sei hasoru joven timoroan sira iha Sentru Konvensaun Dili, tuku 9:30 dadeer, ne’ebé sei dirije mensajen ida ba joven sira. Vizita ne’e sei remata ho serimónia despedida iha Aeroportu Internasionál Prezidente Nicolau Lobato, tuku 10:45 dadeer, molok Santu Padre aranka ba Singapura.
Governu renova ninia konvite ba populasaun atu partisipa ativu iha eventu sira ne’ebé marka ona durante Sua Santidade nia vizita. Selebrasaun Santa Misa Solene iha Tasi Tolu sei sai momentu espesiál fiar no unidade nian ba timoroan tomak.
