Timor-Leste no Austrália reforsa kooperasaun bilaterál
Ohin, loron 30 fulan-agostu tinan 2024, Primeiru-Ministru, Kay Rala Xanana Gusmão, hala’o sorumutu ho Vise-Primeiru-Ministru no Ministru Defeza Austrália, Richard Marles, iha Palásiu Governu, Dili. 
Sorumutu ne’e marka mós prezensa husi Ministru Prezidénsia Konsellu Ministrus, Agio Pereira, Ministru Negósius Estranjeirus no Kooperasaun, Bendito dos Santos Freitas, Ministru Defeza, Donaciano do Rosário Gomes no Embaixadora Austrália nian iha Timor-Leste, Caitlin Wilson.
Governante australianu ne’e mai iha Timor-Leste hodi partisipa iha komemorasoins aniversáriu konsulta populár nian ba da-25, hodi hametin lasu istóriku entre país rua ne’e. 
Iha sorumutu ne’e, diskute temas kooperasaun bilaterál, ho foku iha Programa Mobilidade Laborál (PALM), dezenvolvimentu projetu Greater Sunrise, kooperasaun seguransa marítima no ratifikasaun Memorandu Entendimentu kona-ba Kooperasaun Téknika ba Dezenvolvimentu. 
