Timor-Leste Atribui Nasionalidade Timorense Ba António Guterres
Parlamentu Nasionál aprova ohin, loron 30 Agostu tinan 2024, ho unanimidade fó nasionalidade timoroan ba Sekretáriu-Jerál Nasoins Unidas, António Guterres, nu’udar rekoñesimentu ba ninia servisu maka’as no relevante ne’ebé halo ba nasaun ne’e iha dékada balun nia laran. Distinsaun onradu ne’e reflete knaar importante ne’ebé António Guterres hala’o hodi defende Timor-Leste nia autodeterminasaun no hodi mobilizasaun komunidade internasionál atu apoia independénsia no dezenvolvimentu nasionál. 
Rezolusaun ne’e, asina hosi prezidente Parlamentu Nasionál, Maria Fernanda Lay, destaka importánsia hosi kontribuisaun António Guterres nian iha momentu krusiál oin-oin iha istória Timor-Leste nian foin daudaun ne’e. Hanesan Primeiru-Ministru Portugál (hosi tinan 1995 to'o 2002), Guterres hanesan defensór ida ne'ebé maka koñesidu liu iha altu forum internasionál, ne’ebé dudu realizasaun referendu tinan 1999 nian, ne'ebé to’o nasaun ne’e hetan independénsia.
"Hafoin violénsia ne'ebé mosu depois referendu, António Guterres ne’ebé hala’o knaar fundamentál iha mobilizasaun komunidade internasionál hodi halo intervensaun no estabelese Administrasaun Tranzitóriu Nasoins Unidas iha Timór-Leste (UNTAET), ne'ebé loke dalan ba independénsia tomak nasaun ne’e nian iha tinan 2002”, destaka Parlamentu Nasionál iha rezolusaun.
Durante serimónia, Antonio Guterres afirma hodi asume katak “nasionalidade ida-ne’e hosi povu eroiku ida”, ho kompromisu atu halo buat hotu “atu nune’e timoroan sira bele iha orgullu ho sira-nia sidadaun”. Guterres mós hateten katak hanesan “priviléjiu ida no satisfasaun ida ne’ebé maka’as tebes” atu bele fila fali mai Timor-Leste, iha ne’ebé nia mai dala uluk iha tinan 2000 “iha vizita ida ne’ebé domina ho emosaun, ksolok no esperansa” no iha ne’ebé nia fila fali iha fulan-maiu tinan 2002 “hodi partisipa iha serimónia istóriku restaurasaun independénsia nian”.
Sekretáriu-Jerál destaka mós faktu katak Parlamentu Nasionál prezide hosi feto ida, ne’ebé nia konsidera hanesan “sinál ida atu hametin estatutu feto no direitu feto nian” iha Timor-Leste.
António Guterres hanoin mós kona-ba kalan 29 fulan-agostu tinan 1999 [loron 30 fulan-agostu iha Timor-Leste], ne’ebé nia dehan sei la haluha, kalan ne’ebé nia la dukur tanba entuziazmu tuir prosesu konsulta populár. “Povu timoroan ko’alia no nia lian klaru: Independénsia”, nia subliña hodi destaka “korajen no determinasaun” hosi povu timoroan, “ne’ebé totalmente mobilizadu hodi defende nia autodeterminasaun”.
Refere ba momentu sira hafoin referendu, Guterres hanoin hikas "semana sira ne’ebé nakonu ho terus tuirmai" no mobilizasaun hosi "portugés rihun atus resin ne'ebé maka halo manifestasaun iha dalan sira Lizboa nian hatudu solidariedade ba povu timoroan no ezije intervensaun husi komunidade internasionál". Sekretáriu-Jerál fó mós ninia “omenajen kle’an ba rezisténsia timoroan, ba mane no feto sira ne’ebé halo parte iha laran”, hodi fó hanoin mós kona-ba kna’ar krusiál Nasoins Unidas nian iha mediasaun no organizasaun referendu, “iha períodu tempu badak no maske iha intimidasaun no ameasa sira”.
“Mundu bele aprende buat barak husi Timor-Leste, liu-liu iha momentu konflitu sira ne’ebé maka’as liután no tensaun jeopolítika sira aat liu”, tenik Sekretáriu-Jerál Nasoins Unidas. 
Durante nia vizita ofisiál mai Timor-Leste, António Guterres hetan mós kondekorasaun ho Grande Kolár Orden Timor-Leste, distinsaun aas liu nasaun ne’e nian, hosi Prezidente Repúblika, José Ramos-Horta. Kondekorasaun ne’e hanesan omenajen ida ba papél Guterres nian nu’udar defensór ne’ebé metin ba direitu povu timoroan nian ba autodeterminasaun, tantu iha períodu ne’ebé nia hala’o kna’ar nu’udar Primeiru-Ministru Portugál, no mós iha ninia kna’ar tuirmai hanesan Altu Komisáriu Nasoins Unidas nian ba Refujiadu sira (UNHCR) no, daudaun ne’e, nu’udar Sekretáriu-Jerál ONU nian.
Selebrasaun loron Konsulta Populár 30 fulan-agostu tinan 1999 ba dala 25, ne’ebé lori ba restaurasaun independénsia Timor-Leste, akontese iha territóriu nasionál tomak, ho prezensa figura internasionál importante no membrus Governu nasionál. Selebrasaun sira, ne'ebé ho tema "Povu maka Luta! Povu maka Terus! Povu maka Manán Luta!!! Povu maka Eroi Boot ba Ukun-rasik an!!!", subliña papél fundamentál povu Timór nian hodi hetan ninia independénsia no harii nasaun.
Programa selebrasaun sira iha Dili inklui eventu solene sira iha Estádiu Munisipál Dili, Parlamentu Nasionál, Arkivu no Muzeu Rezisténsia Timorense no iha Palásiu Nobre Lahane.
Programa kompletu kona-ba selebrasaun sira disponivel iha Portál Governu Timor-Leste, iha https://timor-leste.gov.tl/?p=39114&lang=pt.
