Governu Timor-Leste

Iha loron 30 fulan-agostu, Timor-Leste komemora aniversáriu referendu istóriku ba da-25 ne’ebé rezulta restaurasaun independénsia, ho eventu lubun ida ne’ebé subliña importánsia husi marku ida-ne’e iha istória país nian. Selebrasoins, ne’ebé mak hala’o iha loron balun, sura ho prezensa husi ema importante balu, inklui Sekretáriu-Jerál Nasoins Unidas, António Guterres nomos atuál no eis-governantes husi país oin-oin.

Ohin, Sekretáriu-Jerál Nasoins Unidas, António Guterres, to’o ona Dili, iha ne’ebé simu husi Prezidente Repúblika, José Ramos-Horta no husi Primeiru-Ministru, Xanana Gusmão. Iha ninia xegada, António Guterres hetan saudasaun husi labarik atus ba atus durante iha Avenida Nicolau Lobato.

Iha ninia vizita, Sekretáriu-Jerál Nasoins Unidas sei simu kondekorasaun ho Grande Kolár Orden Timor-Leste, hodi rekoñese ninia papél hanesan Primeiru-Ministru Portugál nian hosi tinan 1995 to’o 2002, iha ne’ebé destaka hanesan “defensór proeminente ida ba direitu povu Timor-Leste iha autodeterminasaun no independénsia”.

Komemorasoins Aniversáriu ba da-25 Konsulta Populár 30 agostu tinan 1999 nian sei hala’o iha territóriu Timor-Leste tomak, ho prezensa husi membrus Governu iha kada postu administrativu. Selebrasaun ida-ne’e sei marka ho atividade lubun ida hosi loron 28 to’o loron 30 fulan-agostu tinan 2024, inklui selebrasoins prinsipais iha Dili, iha Estádiu Munisipál Dili, Parlamentu Nasionál, Arkivu no Muzeu Rezisténsia Timorense no iha Palásiu Nobre Lahane.

Ho tema “Povu maka Luta! Povu maka Terus! Povu maka Manán Funu!!!” Povu maka Eroi Boot ba Ukun-rasik an!!!”, selebrasoins hosi tinan ida-ne’e destaka papél krusiál povu timoroan nian iha  konkista ba ninia independénsia.

Programa kompletu ba komemorasoins ne’e disponivel iha Portál Governu Timor-Leste, iha https://timor-leste.gov.tl/?p=39114&lang=pt.