Governu Timor-Leste

Komemorasaun Aniversáriu Konsulta Populár 30 Agostu 1999 nian ba da-25, sei hala’o iha Timor-Leste laran tomak, ho prezensa husi membrus Governu iha kada postu administrativu nasionál. Data istórika ida-ne’e, marka momentu desizivu ida ne’ebé fundamentál iha istória Timor-Leste nian, sei realiza ho eventu lubun ida hosi loron 28 to’o 30 fulan-agostu tinan 2024, ne’ebé envolve líderes nasionais no internasionais, nune’e mós partisipasaun ativa husi populasaun.

Ho tema “Povu maka Luta! Povu maka Terus! Povu maka Manán Funu!!! Povu mak Eroi ba Ukun-rasik an!!!”, selebrasaun tinan ida-ne’e destaka papél importante tebe-tebes povu timoroan nian iha luta ba ukun-rasik an.

Iha Dili, selebrasaun prinsipál sira sei hala’o iha Estádiu Munisipál Dili no sei inklui mós sesaun solene ida iha Parlamentu Nasionál, espozisoins iha Arkivu no Muzeu Rezisténsia Timorense no jantár ofisiál ida iha Palásiu Nobre Lahane. Eventu ne’e sei sura ho prezensa husi figuras internasionais, ne’ebé inklui atuál no antigu xefes Estadu no Governu, aleinde governante no figura importante sira seluk, inklui Sekretáriu-Jerál Nasoins Unidas.

Festividades ne’e sei inklui atividade lubun ida, hanesan konsertu, marxa, aprezentasaun kulturál no diskursu ofisiál sira, hodi selebra reziliénsia no vitória povu timoroan nian.

Governu Timor-Leste konvida sidadaun hotu-hotu atu partisipa ho ativu iha selebrasaun sira-ne’e, ne’ebé hanesan testemuñu espíritu rezisténsia, sakrifísiu no vitória povu timoroan nian.

Programa kompletu ba komemorasoins ne’e disponivel iha Portál Governu Timor-Leste, iha https://timor-leste.gov.tl/?p=39114&lang=tp.