Bolseiru na’in-51 Dahuluk husi Programa Reforma Setór Justisa sei kontinua Estudu iha Universidade Portugál
![455682817_369173069572361_6490106905010137554_n](https://timor-leste.gov.tl/wp-content/uploads/2024/08/455682817_369173069572361_6490106905010137554_n-300x189.jpg)
Primeiru-Ministru, Kay Rala Xanana Gusmão, iha loron 15 fulan-agostu tinan 2024, prezide serimónia despedida ba bolseiru timoroan na’in-51, ne’ebé hala’o iha Centro de Formação Jurídica e Judiciária, Dili. Bolseiru sira-ne’e sei kontinua sira-nia estudu iha Portugál, iha ámbitu Programa Reforma Setór Justisa nian.
Iha ninia diskursu, Primeiru-Ministru fó korajen ba bolseiru sira, hodi subliña importánsia husi misaun ne’ebé daudaun ne’e sira hasoru. Xanana Gusmão bolu atensaun atu “estuda maka’as no hanoin bá sakrifísiu inan-aman sira nian”, no salienta mós relevánsia atu “labele haluha misaun ne’ebé tenke kumpre, tanba nasaun presiza imi, presiza imi-nia matenek.” Xefe Governu realsa, esforsu bolseiru sira nian ne’e importante tebes, la’ós de’it ba sira-nia dezenvolvimentu pesoál, maibé mós ba futuru Timor-Leste nian.
Xanana Gusmão mós husu ba bolseiru sira-nia inan-aman, atu fó motivasaun no apoia sira-nia oan durante hala’o sira-nia estudu no afirma mós katak “imi la’ós estuda de’it atu sai juis no prokuradór; ho imi-nia esforsu, bele fó inspirasaun ba joven sira seluk atu la’o tuir área jurídika.”
Husi bolseiru na’in-51 ne’e, 48 sei frekuenta Fakuldade Direitu no na’in-tolu sei espesializa iha Medisina Legál, iha instituisoins ensinu superiór iha Portugál. Inisiativa ida-ne’e inklui iha ámbitu programa reforma setór justisa nian, ne’ebé koordena husi Lúcia Lobato, ho objetivu atu forma profisionais ho kualidade aas iha área oinoin Justisa nian, hodi kontribui ba dezenvolvimentu sistema judisiál ida ne’ebé metin no efisiente iha Timor-Leste.
Iha loron 26 fulan-juñu, iha Embaixada Timor-Leste nian iha Lizboa, asina protokolu kooperasaun lima ho fakuldade prinsipál sira Direitu nian iha Portugal, ne’ebé prevee kada tinan haruka estudante timoroan na’in-50 ba formasaun espesializada iha tinan lima tuirmai. Akordu sira-ne’e formaliza ona ho Universidade Católica Portuguesa, Universidade do Minho, Universidade de Lisboa, Universidade do Porto no NOVA School of Law.
Projetu kapasitasaun rekursus umanus ida-ne’e la limita ba setór justisa, maibé abranje mós servisus jurídikus administrasaun públika no ambiente akadémiku Timor-Leste nian. Jurista besik na’in-250 to’o na’in-300 sei hetan formasaun to’o tinan 2028, iha investimentu ida ho totál besik dolar amerikanu millaun 16, ne’ebé finansia totál husi Timor-Leste.
Serimónia ne’e marka mós prezensa husi personalidade importante balun, inklui Koordenadora Grupu Traballu ba Reforma Setór Justisa, Lúcia Lobato, Ministru Justisa, Sérgio de Jesus Fernandes da Costa Hornai, nune’e mós Prezidente Tribunál Rekursu, Prokuradór-Jerál Repúblika, Ministru Ensinu Superior, Siénsia no Kultura, Ministra Saúde, aleinde família bolseiru sira nian no reprezentante husi entidade oin-oin.