Timor-Leste partisipa iha Konsellu Komunidade Sósiu-kulturál ASEAN (ASCC)
Ministra Solidariedade Sosiál no Inkluzaun Timor-Leste, Verónica das Dores, partisipa iha Sorumutu sira Konsellu Komunidade Sósiu-kulturál ASEAN (ASCC) nian ho Deputadu sira, personalidade eminente ASCC no Prezidente Órgaun Ministeriál Setoriál ASCC nian, ne’ebé hala’o iha loron 12 no 13 fulan-agostu tinan 2024, iha Vientiane, Repúblika Demokrátika Populár Laos. 
Eventu ne’e halibur reprezentante nivel altu husi nasaun membru ASEAN no Timor-Leste, nu’udar observadór, ho objetivu atu diskute kona-ba tendénsia emerjente, dezafiu no rekomendasaun sira ba preparasaun Planu Estratéjiku ASCC nian, inklui dijitalizasaun, alterasaun demográfika, alterasaun klimátika no envolvimentu husi parte interesada sira. 
Durante ninia diskursu, Ministra Verónica das Dores hato’o ninia agradesimentu kle’an ba Governu Laos ba ospitalidade ne’ebé di’ak no destaka importánsia husi kolaborasaun rejionál hodi rezolve dezafiu komún sira. “Timor-Leste fahe preokupasaun hanesan ho nasaun ASEAN sira seluk, liuliu kona-ba ameasa klimátika no sibernétika”, dehan Ministra, hodi subliña relevánsia estratéjia ida ne’ebé metin no adaptavel ba futuru rejiaun nian. 
Ministra mós hahí prosesu konsulta abranjente ne’ebé lidera hosi ko-prezidente sira hosi grupu traballu ad-hoc no Sekretariadu ASEAN nian, hodi afirma katak “perspetiva oioin no orientasaun espesializada sira-ne’e sei kontribui ba Planu Estratéjiku Pós-2025 ne’ebé inkluzivu no aliñadu ho objetivu rejionál ba dezenvolvimentu sustentável”. 
Vizite mós ami iha Facebook https://www.facebook.com/portal.GOV.TL
