Governu Timor-Leste

Governu Timor-Leste, ne’ebé reprezenta husi Ministru Administrasaun Estatál no Koordenadór-Jerál Interinu Altu Nivel Institusionál ba Vizita Sua Santidade Papa Francisco, Tomás do Rosário Cabral, iha loron 12 fulan-agostu tinan 2024, entrega ofisiálmente Igreja Katedrál Nossa Senhora Imaculada Conceição, Vila Verde, ba Igreja Katólika, hafoin halo prosesu reabilitasaun ida ho durasaun fulan neen.

Serimónia entrega ne’e, marka prezensa husi Kardeál Dom Virgílio do Carmo da Silva, ne’ebé reprezenta Igreja Katólika iha Timor-Leste. Iha okaziaun ne’e, Kardeál no Ministru Tomás Cabral asina termu entrega obra reabilitasaun Katedrál no rezidénsia kongregasaun Irmãs ALMA (Madre Asosiasi Lembaga Misionaris Awan) nian. 

Reabilitasaun Igreja Katedrál ne’e konklui ho investimentu ida ne’ebé besik dolar amerikanu rihun 533, enkuantu obra iha rezidénsia Irmãs ALMA nian ho montante dolar amerikanu kuaze rihun 286. Intervensaun rua-ne’e, finaliza tuir tempu ba vizita Sua Santidade Papa Francisco nian mai Timor-Leste. 

Durante serimónia ne’e, Ministru Tomás Cabral subliña importánsia ba projetu ne’e, hodi haktuir katak, “ohin, ami entrega sasán ne’ebé Governu prepara liuhusi serbisu hamutuk ho Igreja Katólika hodi simu vizita Santu Padre nian. Governante ne’e hatutan mós katak, “hafoin vizita Papa, sei aprezenta relatóriu jerál ida kona-ba despeza ba Konsellu Ministrus no hodi fó-sai ba públiku”. 

Kardeál Dom Virgílio do Carmo da Silva hato’o ninia agradesimentu ba Governu ba laran- luak no apoiu ba Igreja Katólika, hodi subliña katak, reabilitasaun Katedral ne’e reprezenta la’ós de’it renovasaun ba espasu fíziku, maibé mós ba fiar komunidade katólika timoroan nian. “Ha’u hakarak husu ba sarani sira hotu atu kolabora, atu nune’e Santu Padre nia vizita ne’e sai momentu grasa nian ba ita hotu. Ho vizita Papa nian, ita renova ita-nia Katedrál, no ita sarani sira, ita tenke renova ita-nia fuan no ita-nia moris”, apela Kardeál.

Entrega ofisiál obra ne’e marka inísiu ba atividade espirituál iha Katedrál ne’ebé reabilita ona, hodi hahú ho bensan espesiál ida iha dadeer loron tuir-mai, ne’ebé lidera husi Kardeál Dom Virgílio do Carmo da Silva. Kardeál enkoraja parokianu sira no komunidade atu fó kuidadu ba uma foun ne’e ho orasaun, prezerva ninia furak ba jerasaun sira tuirmai. 

Eventu ne’e hetan partisipasaun husi autoridade relijioza no governamentál oioin nune’e mós reprezentantes husi empreza sira ne’ebé envolve iha obra ne’e.