Komité Revizaun Polítiku hahú análize ba OGE 2025
Governu, liuhosi Komité Revizaun Polítika, hahú horisehik, 12 Agostu 2024, análize ba programa no proposta orsamentál sira hosi ministériu no ajénsia autónoma sira, ho objetivu atu prepara versaun finál ba projetu Proposta Lei Orsamentál Jerál ba Estadu (OJE) ba tinan 2025, ne’ebé depois sei submete ba Parlamentu Nasionál. Enkontru sira Komité Revizaun Polítika nian sei hala’o to’o loron 27 fulan Agostu, iha Auditóriu Ministériu Finansas nian.
Komité Revizaun Polítiku iha responsabilidade atu verifika alokasaun estratéjiku rekursu sira iha submisaun orsamentál sira, atu nune’e bele garante kumprimentu ba kompromisu no objetivu sira ne’ebé define ona iha dokumentu estratéjiku sira, no ba avaliasaun viabilidade planu sira ba tinan fiskál 2025.
Komité Revizaun Polítika ne’e prezide hosi Primeiru-Ministru no inklui, entre ninia membru sira, Vise-Primeiru-Ministru na’in-rua, Ministra Finansas, Ministru Obras Públikas no Ministru Planeamentu Estratéjiku no Investimentu. Sekretáriu Estadu Igualdade no Inkluzaun, Prezidente Institutu Defeza Direitu Labarik no reprezentante ida husi Asosiasaun Defisiente Timor-Leste sei partisipa mós iha enkontru sira nu’udar observadór. 
Komité Revizaun Polítiku tenke asegura kapasidade hodi ezekuta planu anuál ba servisus no entidades setór públiku administrativu nian no ninia konformidade ho prioridade nasionál sira ne’ebé define ona iha Planu Estratéjiku Dezenvolvimentu tinan 2011 – 2030, iha Programa Governu, iha planu sira ba médiu prazu nian no iha planu anuál husi servisu no entidade sira setór públiku administrativu nian, no iha dokumentu polítiku no estratéjiku sira seluk husi Governu. Alokasaun dotasaun orsamentál sira ba servisu no entidade ida-idak, tenke tuir ninia planu anuál no kumpre limite másimu despeza nian, ne’ebé molok ne’e, define ona ba títulu ida-idak. 
Konsellu Ministru, iha ninia sorumutu iha loron 17 fulan-jullu tinan 2024, estabelese valór totál gastu nian ba kada títulu orsamentu OGE 2025 nian, hodi prevee valór globál biliaun 1,8 dolar amerikanu.
Distribuisaun tetu orsamentu agregadu ba Administrasaun Sentrál iha OGE 2025 halo bazeia ba setór sira ne’ebé define ona iha Programa Governu no Planu Estratéjiku Dezenvolvimentu Nasionál, ho Setór Kapitál Sosiál hetan alokasaun 38%, tuir fali Setór Kuadru Institusionál, ho 36%, Dezenvolvimentu Infraestrutura, ho 16%, no Dezenvolvimentu Ekonómiku, ho 10%.
Proposta Lei OGE 2025 sei submete ba Parlamentu Nasionál to’o loron 1 fulan-outubru tinan 2024.
