Governu Timor-Leste

Horisehik, loron 11 fulan-agostu tinan 2024, Prezidente Índia, Droupadi Murmu, konklui ona ninia vizita ofisiál mai Timor-Leste, ne’ebé nu’udar vizita dahuluk Xefe Estadu indianu nian mai país ne’e. Durante ninia estadia iha Timor, realiza sorumutu altu nivel sira ne’ebé hamosu akordus bilaterais importantes no reforsu relasoins entre país rua ne’e. 

Vizita ne’e hahú iha loron 10 fulan-agostu ho resesaun ofisiál ida iha Palásiu Prezidensiál Nicolau Lobato, iha ne’ebé Prezidente Murmu simu husi Prezidente Repúblika, José Ramos-Horta. Tuir kedas ho sorumutu bilaterál ida iha ne’ebé ko’alia kona-ba kooperasaun iha área oioin, hanesan teknolojia, agrikultura, saúde, defeza, infraestruturas no edukasaun. Iha enkontru ida-ne’e, Prezidente Ramos-Horta kondekora Prezidente Murmu ho medalla Orden Timor-Leste, Grande Colar, hodi fó rekoñesimentu ba ninia lideransa no kontribuisaun atu hametin relasaun entre país rua ne’e. Sira diskute mós kona-ba instalasoins futuras Embaixada Timor-Leste nian iha Índia no Índia nian iha Timor-Leste. 

Tuirmai, Prezidente Índia dezloka ba Palásiu Governu hodi hala’o sorumutu ho Primeiru-Ministru, Kay Rala Xanana Gusmão, iha prezensa husi membrus Governu Konstitusionál IX nian balun. Iha sorumutu ida-ne’e, asina akordu tolu: Akordu ida kona-ba Izensaun Vistu ba Titulár Pasaporte Diplomátiku no Servisu, Memorandu Entendimentu ida kona-ba Programa Interkámbiu Kulturál ba tinan 2024-2028, no Memorandu Entendimentu ida kona-ba Kooperasaun iha Radiodifuzaun entre Rádiu no Televizaun Timor-Leste (RTTL) no Prasar Bharati, hosi Índia. 

Durante sorumutu ho Xefe Estadu Índia nian, Primeiru-Ministru Xanana Gusmão hato’o ninia gratidaun ba apoiu Índia nian ba Timor-Leste durante luta ba ukun rasik-an, ko’alia-liu mós kooperasaun kontínua iha área estratéjika sira hanesan edukasaun, saúde no agrikultura. 

Molok han-kalan ofisiál, ne’ebé Prezidente Repúblika, José Ramos-Horta oferese, iha Palásiu Nobre Lahane, Prezidente Índia partisipa iha talk show “Horta Show”, ne’ebé hala’o iha Salaun Nobre Ministériu Negósius Estranjeirus no Kooperasaun nian. Eventu ida-ne’e proporsiona plataforma ida hodi diskute kooperasaun rejionál no internasionál, liuliu kona-ba adezaun Timor-Leste ba ASEAN, ne’ebé prevee ba tinan 2025, hetan apoiu makaas husi Índia.

Vizita ida-ne’e inklui iha dezlokasaun lubun ida ba rejiaun Pasífiku, ne’ebé inklui mós vizita ba Fiji no ba Nova Zelándia.