Governu Timor-Leste

Ministru Prezidénsia Konsellu Ministrus, Agio Pereira, ohin, loron 9 fulan-agostu tinan 2024, reprezenta Primeiru-Ministru, Kay Rala Xanana Gusmão, iha reuniaun Konsellu Superiór Defeza no Seguransa, ne’ebé hala’o iha Palásiu Prezidensiál Nicolau Lobato. Sesaun ne’e prezide hosi Prezidente Repúblika, José Ramos-Horta, no hetan partisipasaun hosi representante Governu oioin no entidade sira seluk ne’ebé iha ligasaun ba defeza no seguransa nasionál. 

Aleinde Ministru Prezidénsia Konsellu Ministrus, sorumutu ne’e hetan partisipasaun mós husi Ministru Negósius Estranjeirus no Kooperasaun, Bendito dos Santos Freitas, Ministru Justisa, Sérgio de Jesus Fernandes da Costa Hornai, no Ministru Interiór, Francisco da Costa Guterres. Partisipa mós Xefe Estadu Maiór Jenerál FALINTIL - Forsa Defeza Timor - Leste (F-FDTL), Tenente-Jenerál Falur Rate Laek, Komandante Jerál Polísia Nasionál Timor-Leste (PNTL), Henrique da Costa, Diretór-Jerál Servisu Nasionál Intelijénsia ( SNI), Longuinhos Monteiro, no membru na’in rua hosi Komisaun Negósius Estranjeirus, Defeza no Seguransa (Komisaun B) Parlamentu Nasionál nian. 

Ida-ne'e maka partisipasaun dahuluk hosi Ministru Justisa, Sérgio Hornai, iha Konsellu Superiór Defeza no Seguransa nian dezde nia tomada-de-pose iha loron 15 fulan-fevereiru tinan 2024.

Iha sesaun ne’e, ko’alia kona-ba medida ne’ebé nesesáriu hodi garante seguransa durante selebrasaun no vizita hosi altu dignitáriu sira ne’ebé realiza iha fulan Agostu no Setembru, ho objetivu atu garante seguransa no estabilidade nasaun nian durante eventu sira ne’e.