Timor-Leste Hakarak Rekoñesimentu UNESCO nian ba Parke Nasionál Nino Konis Santana
Governu, liuhusi Ministériu Agrikultura, Pekuária, Peskas no Florestas, iha parseira ho Organizasaun Nasoins Unidas ba Edukasaun, Siénsia no Kultura (UNESCO) iha Jakarta, organiza semináriu ida kona-ba kandidatura atu nomea Parke Nasionál Nino Konis Santana hanesan rezerva biosfera iha ámbitu Programa “Ema no Biosfera” UNESCO nian. Eventu ida-ne’e, hala’o iha loron 7 fulan-agostu tinan 2024, iha Ministériu Negósius Estranjeirus no Kooperasaun, Dili, ne’ebé hola parte iha esforsu konservasaun no dezenvolvimentu sustentavel Parke Nasionál Nino Konis Santana nian.
Semináriu ne’e mós ho objetivu atu kria komisaun ida hodi asegura katak rekizitu hot-hotu hodi aprezenta kandidatura nian ba UNESCO, kumpre ona molok prazu ne’ebé estipula ona, iha loron 30 fulan-setembru.
Ministru Agrikultura, Pekuária, Peskas no Florestas, Marcos da Cruz, destaka importánsia atu hetan estatutu ida-ne’e ba Parke Nasionál Nino Konis Santana, hodi konsidera parke ne’e nu’udár “sentru biodiversidade ida” ne’ebé “sei kontribui ba valór ekolójiku no kulturál”, “hodi intensifika esforsu Governu iha konservasaun no dezenvolvimentu sustentável parke nian”.
Iha ninia diskursu, Sekretáriu Estadu Florestas, Fernando Vieira da Costa, fó énfaze ba kompromisu Governu Konstitusionál IX nian atu promove sustentabilidade no konservasaun biodiversidade.
“Bazeia ba polítika Governu Konstitusionál IX no programa sira ne’ebé aprova ona husi Parlamentu Nasionál, ita-nia jestaun florestál ho objetivu atu dezenvolve Sistema Nasionál Área Protejida no Parke sira, nune’e mós Konservasaun Biodiversidade,” nia deklara.
Sekretáriu Estadu mós hato’o agradesimentu ba Ryuichi Fukuhara, husi UNESCO Jakarta, no Prof. Purwanto, husi Indonézia, “ba sira-nia kontribuisaun sira ne’ebé iha valór boot no partilla esperiénsia sira”.
Rekoñesimentu internasionál ba Parke Nasionál Nino Konis Santana ne’e “la’ós de’it destaka valór ekolójiku no kulturál parke nian, maibé mós reforsa mekanizmu konservasaun no dezenvolvimentu sustentável iha Timor-Leste”. "Dezignasaun hanesan rezerva biosfera nian sei kontribui maka'as ba promosaun ekoturizmu no envolvimentu komunidade lokál iha prezervasaun biodiversidade."
Serimónia ne’e partisipa hosi Koordenadór Rezidente Organizasaun Nasoins Unidas iha Timor-Leste, Funmi Balogun, reprezentante UNESCO iha Jakarta, Ryuichi Fukuhara, no konvidadu sira seluk.
