Primeiru-Ministru simu Vise-Ministra Komité Sentrál Partidu Komunista Xinés
Primeiru-Ministru, Kay Rala Xanana Gusmão, hala’o sorumutu ho Sun Haiyan, Vise-Ministra Departamentu Internasionál Komité Sentrál Partidu Komunista Xinés nian (IDCPC), iha loron 1 fulan-agostu tinan 2024, iha Palásiu Governu, Dili.
Enkontru ne’e mós partisipa hosi Vise-Ministra ba Asuntus ASEAN no Ministra Interina Negósius Estranjeirus no Kooperasaun, Milena Rangel, ho objetivu atu hametin relasoins diplomátikas no kooperasaun entre nasaun rua ne’e. 
Tuir vizita Primeiru-Ministru, Kay Rala Xanana Gusmão nian, foin lalais ne’e ba Xina, hosi loron 30 fulan-marsu to’o loron 2 fulan-abríl tinan 2024, no Prezidente José Ramos-Horta, hosi loron 28 to’o loron 31 fulan-jullu tinan 2024, iha ne’ebé asina ona akordu kooperasaun oioin, reuniaun ida-ne’e ho objetivu atu akompaña rezultadu hosi vizita hirak-ne’e. Iha enkontru ne’e mós diskute área kooperasaun oioin, hanesan ekonomia, agrikultura no seluk tan.
