Governu Timor-Leste

Sentru Transmissór Radiu Televizaun Timor-Leste distritu Ainaro nian hetan tiha ona inaugurasaun iha loron 17 liu ba, no Sekretáriu Estadu Konsellu Ministru nian, Ágio Pereira, no Presidente Parlamentu Nasionál mós ba hotu.

Fernando “La Sama” de Araújo dehan katak Governu hakas-an atu hadi’a fali infraestrutura RTTL EP nian sira iha distritu hotu-hotu, hodi nune’e populasaun sira bele hetan informasaun kona-ba dezenvolvimentu nasionál. Nu’udar Ainaro oan, Presidente Parlamentu dehan katak nia kontenti ho inaugurasaun ida ne’e, ne’ebé hatudu progresu no bele halo populasaun sira rona rádiu moos tebe-tebes no bele haree televizaun la liu husi antena parabólika. “Informasaun hirak transmite husi radiu no televizaun bele halo populasaun akompaña atividade Governu nian no asisti ami nia diskusaun sira iha Parlamentu Nasionál, liu husi transmisaun direta. Ida ne’e hatudu katak ema hotu-hotu bele ona akompaña prosesu dezenvolvimentu ne’ebé mak oras ne’e hala’o hela iha ita nia Rai laran”, koalia Presidente Parlamentu, “La Sama” de Araújo.

Ágio Pereira, Sekretáriu Estadu Konsellu Ministru, koalia katak Sentru Transmissór sei benefisia ema besik nain rihun 63 ne’ebé mak hela iha distritu Ainaro. “Ida n e’e dezafiu boot ida ba RTTL” koalia Sekretáriu Estadu, hodi hatutan tan katak “la’os deit infraestrutura mak tenke diak maibé mós estrutura instituisaun nian tenke forte. Transmisaun bele diak, maibé karik informasaun sira ladún ho kualidade, mak infraestrutura sira mós lakon ninia sentidu. IV Governu Konstitusionál hosi Aliansa Maioria Parlamentár nia prioridade boot ida mak asesu ba informasaun, informasaun ne’e ran demokrasia nian, ita bele harii no haburas demokrasia bainhira informasaun to’o ba povu no povu mós hato’o informasaun ba Governu, husi ida ne’e mak haburas demokrasia”, dehan Sekretáriu Estadu Konsellu Ministru.

Konstrusaun edifísiu Sentru Transmissór distrito Ainaro ninia folin hamutuk osan dólar amérika 120.821. Obra ne’e hahú tiha ona iha tinan 2009, husi empreza Ailora Enterprise, iha rai ne’ebé populasaun husi suku Manutasi mak oferese.

Tuir iha inaugurasaun ne’e mak Sekretáriu Estadu Konsellu Ministru no Prezidente Parlamentu Nasionál, Presidente Konsellu Administrativu RTTL EP nian, Expedito Dias Ximenes, diretor no funsionariu sira empreza nian no Administradór Ainaro, Manuel Pereira, hamutuk ho autoridade lokál nian sira.