Sorumutu Interministeriál hodi Koordena Atividade Seguransa iha Eventu Ofisiál sira
Iha loron 1 fulan-agostu tinan 2024, Governu hala’o sorumutu interministeriál ida hodi koordena atividade seguransa iha ámbitu eventu oioin no vizita ofisiál hosi figura importante sira iha país ne’e. 
Sorumutu ne’e prezide husi Primeiru-Ministru, Kay Rala Xanana Gusmão, no sura mós ho partisipasaun husi Ministru Prezidénsia Konsellu Ministrus, Agio Pereira; Ministru Justisa, Sérgio de Jesus Fernandes da Costa Hornai; Ministru Defeza, Donaciano do Rosário Gomes; Ministru Interior, Francisco da Costa Guterres no Diretór-Jerál Servisu Nasionál Intelijénsia, Longuinhos Monteiro.
Sorumutu ne’e ho objetivu atu garante koordenasaun ida ne’ebé efikás entre ministériu oioin no servisu seguransa sira, hodi asegura protesaun ba vizitante sira ne’ebé sei partisipa iha eventus importantes iha Timor-Leste. Entre eventu sira-ne’e, maka selebrasaun tinan 25 Konsulta Populár, iha loron 30 fulan-agostu, ne’ebé sei sura ho prezensa husi Sekretáriu-Jerál Nasoins Unidas, António Guterres, xefes governu, governantes no figura importante sira seluk. Iha loron 10 fulan-agostu, prevee ona vizita ofisiál husi Prezidente Índia, Draupadi Murmu.
