Timor-Leste no Xina Reforsa Kooperasaun Ekonómika
Iha loron 29 fulan-jullu tinan 2024, Governu Repúblika Demokrátika Timor-Leste no Governu Repúblika Populár Xina asina akordu kooperasaun lubun ida, hodi reforsa relasoins bilaterais iha área oin-oin dezenvolvimentu ekonómiku no infraestruturas nian. Serimónia asinatura ne’e hala’o iha Pekin, iha prezensa Prezidente Repúblika Timor-Leste, José Ramos-Horta, no Prezidente Xina, Xi Jinping. 
Entre akordu hirak ne’ebé asina ona maka Memorandum Entendimentu entre Vise-Primeiru-Ministru Francisco Kalbuadi Lay no Ministru Komérsiu Repúblika Populár Xina, Wang Wentao, ne’ebé ho objetivu atu hametin kooperasaun iha investimentu ekonomia dijitál no promove dezenvolvimentu sustentavel. Asina mós akordu ida ho Luo Zhaohui, husi Ajénsia Kooperasaun, hodi promove implementasaun inisiativas globais ba dezenvolvimentu no projetu infraestruturas iha Timor-Leste.
Durante vizita ofisiál ne’e, Prezidente José Ramos-Horta, akompaña husi Vise-Primeiru-Ministru Francisco Kalbuadi Lay no Embaixadór Timor-Leste ba Xina, Loro Horta, hasoru malu ho Prezidente Xi Jinping no ema-boot importante xinés sira seluk. Prezidente Xi Jinping hato’o Xina nia apoiu adezaun Timor-Leste ba ASEAN, hodi kompromete atu partilla oportunidade dezenvolvimentu liuhusi plataformas rejionais kooperasaun nian. 
Ministru Negósius Estranjeirus no Kooperasaun, Bendito Freitas, asina mós akordu rua seluk, ida ho Ajénsia Kooperasaun Internasionál ba Dezenvolvimentu Xina, relasiona ho kooperasaun téknika no ekonómika, no ida seluk ho Administrasaun Aviasaun Sivíl Xina, ne’ebé iha relasaun ho Akordu Servisus Aéreus entre país rua ne’e. Ministru Bendito Freitas destaka importánsia husi Inisiativa “Belt and Road” hodi asegura parseria ida metin ho Xina, liu-liu kona-ba dezenvolvimentu infraestruturas. 
