Governu Timor-Leste

Iha loron 30 fulan-jullu tinan 2024, Timor-Leste organiza Forum Emprezariál ida kona-ba Oportunidade Investimentu iha Pekin, Xina, ho objetivu atu aprezenta no esplora oportunidades negósiu iha nasaun ne’e. Eventu ne’e sura ho prezensa kuaze reprezentante na’in-200 hosi setór públiku no privadu xinés no foka ba hametin relasaun bilaterál no atrai investimentu sira husi Xina. 

Forum ne’e lidera husi Prezidente Repúblika, José Ramos-Horta, no Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay. Forum ne’e mós partisipa husi Ministru Negósius Estranjeirus no Kooperasaun, Bendito dos Santos Freitas, Embaixadór Timor-Leste iha Xina, Maubere Lorosae da Silva Horta, governante sira seluk no reprezentante entidade nasionál sira.

Durante eventu, destaka relasaun sólidu tinan 22 entre Timor-Leste no Xina, nune’e mós Xina nia pozisaun nu’udar poténsia globál no rejionál. Prezidente Ramos-Horta fó énfaze ba importánsia atu hadi’a kondisaun ba investimentu, ho énfaze espesiál hodi dezenvolve lei protesaun investimentu. 

Iha ninia diskursu, Vise-Primeiru-Ministru Francisco Kalbuadi Lay agradese ba Governu Xina no empreza partisipante sira ba sira-nia interese hodi esplora oportunidade investimentu iha Timor-Leste. “Relasaun entre Timor-Leste ho Xina hakat liu diplomasia, ita iha istória amizade no kooperasaun ne’ebé kle’an. Ami iha kompromisu atu kria ambiente favoravel ida ne'ebé permite ba investimentu sira ne'ebé maka fó benefísiu ba nasaun rua ne'e,” dehan Kalbuadi Lay.

Eventu ne’e mós sai hanesan plataforma ida hodi aprezenta oportunidade investimentu oioin iha Timor-Leste, ne’ebé kobre setór sira hanesan infraestrutura, agrikultura no turizmu. Delegasaun timoroan destaka lokalizasaun estratéjiku país nian, forsa traballu joven no rekursu naturál sai nu’udár vantajen prinsipál ba investidór potensiál sira. 

Ministru Petróleu no Rekursus Minerais, Francisco Monteiro, no Ministru Agrikultura, Peskas, Florestas no Pekuária, Marcos da Cruz, konvida empreza xineza sira atu investe iha setór sira hanesan petróleu, gás no minériu metáliku, no mós iha setór agrikultura.

Francisco Monteiro ko’alia-liu kona-ba oportunidade sira iha setór minerál, hodi destaka minerál estratéjiku sira hanesan lítiu no nikel, ne'ebé uza iha produsaun bateria ba veíkulu elétriku sira no indústria esensiál sira seluk. 

Governante ne’e aprezenta mós projetu Tasi Mane, projetu estratéjiku ida ba tempu naruk, ne’ebé ho objetivu atu kria infraestruturas-xave hodi fasilita dezenvolvimentu indústria mina no gás, setór ne’ebé iha potensiál boot iha Timor-Leste tantu rai-maran nune’e mós tasi-laran.

Forum ida-ne’e reforsa Timor-Leste nia kompromisu ba integrasaun rejionál, inklui adezaun foin lalais ne’e ba Organizasaun Mundiál Komérsiu (OMK) no negosiasaun sira ne’ebé la’o hela hodi adere ba ASEAN. Kompromisu hirak-ne'e hanesan pasu importante hodi promove no proteje investimentu sira, oferese baze legál ida ne'ebé sólidu ba operasaun investimentu tantu nasionál nune’e mós internasionál.